आत्तापर्यंत एखादा आजार बरा करणाऱ्या प्रत्येकालाच आपण डॉक्टर म्हणायचो. पण आता यात मोठा बदल करण्यात आला आहे. कोणाला आपल्या नावापुढे डॉ. लिहायचं आणि कोणाला नाही, याचं कडक पालन होणार आहे. नव्या आदेशानुसार, आता फिजिओथेरपिस्टना नावापुढे "डॉ." लिहिण्याची परवानगी राहणार नाही.

आरोग्य सेवा महानिदेशालयाने याबाबत आदेश काढला आहे. आरोग्य सेवा महानिदेशक डॉ. सुनीता शर्मा यांनी स्पष्ट केलं की, आता केवळ वैद्यकीय डॉक्टरच आपल्या नावापुढे डॉ. असं लावू शकतील. फिजिओथेरपिस्टना हा दर्जा वापरण्याची परवानगी दिल्यास रुग्ण आणि सामान्य जनतेमध्ये संभ्रम निर्माण होतो व त्यामुळे चुकीचे उपचार होण्याचा धोका असतो.

काय आहे नेमकं प्रकरण?

महानिदेशालयाने आपल्या पत्रात नमूद केलं आहे की, फिजिओथेरपिस्ट आपल्या नावापुढे 'डॉ.' आणि मागे 'पीटी' लिहित असल्याबाबत भारतातील विविध संघटनांकडून, विशेषत: भारतीय भौतिक चिकित्सा आणि पुनर्वसन संघटनेकडून (IAPMR) अनेक आक्षेप नोंदवले गेले होते.

या आक्षेपांचा दाखला देत DGHS ने स्पष्ट केले की फिजिओथेरपिस्टना वैद्यकीय डॉक्टर म्हणून प्रशिक्षण दिलं जात नाही. त्यामुळे त्यांनी 'डॉ.' हा शब्द वापरणं योग्य नाही. असं केल्याने रुग्ण आणि जनसामान्यांची दिशाभूल होऊन फसवणुकीला खतपाणी मिळू शकते.

फिजिओथेरपिस्टना 'डॉ.' लावण्याबाबत प्रश्नचिन्ह

फिजिओथेरपिस्टना प्राथमिक उपचार करण्याची परवानगी नसावी, असंही DGHS ने स्पष्ट केलं आहे. त्यांनी केवळ रेफर केलेल्या रुग्णांवर उपचार करावेत कारण चुकीच्या फिजिओथेरपीमुळे रुग्णाची तब्येत अधिक बिघडू शकते.

"डॉ." वापरणं बेकायदेशीर

पत्रात नमूद करण्यात आलंय की, पटना उच्च न्यायालय, तामिळनाडू मेडिकल काऊंसिल, बेंगळुरू न्यायालय आणि मद्रास उच्च न्यायालय यांनी आधीच निर्णय दिला आहे की, एखादा फिजिओथेरपिस्ट वैद्यकीय नोंदणी (मेडिकल रजिस्ट्रेशन) शिवाय आपल्या नावापुढे "डॉ." लावतो, तर ते बेकायदेशीर आहे.

फिजिओथेरपी अभ्यासक्रम 2025

डॉ. सुनीता शर्मा यांनी सांगितलं की, नुकताच NCAHP ने जाहीर केलेल्या फिजिओथेरपी अभ्यासक्रम 2025 मध्ये देखील 'डॉ.' या शब्दाचा उल्लेख टाळावा. त्याऐवजी "फिजिओथेरपिस्ट" हा स्पष्ट आणि सन्मानजनक दर्जा वापरावा, जेणेकरून रुग्णांची चुकीची दिशाभूल होणार नाही.