7 warning signs of kidney failure: शरीरात 'हे' ७ बदल दिसले तर समजा किडनी होऊ शकते; वेळीच डॉक्टरांकडून उपचार घ्या

मानवाच्या शरीरात किडनी हा एक अत्यंत महत्त्वाचा अवयव आहे. मात्र, कधी कधी किडनीच्या कार्यात अडथळे निर्माण होतात आणि त्याचे गंभीर परिणाम आपल्याला भोगावे लागतात. तज्ज्ञांच्या म्हणण्यानुसार, किडनीच्या कार्यात कोणताही बदल झाला तर त्याचे संकेत तुम्हाला शरीरात दिसू लागतात.

किडनीचं कार्य बिघडण्यापूर्वी किंवा किडनी फेल होण्यापूर्वी काही लक्षणं तुम्हाला शरीरात दिसू लागतात. ही लक्षणं वेळीच ओळखली तर मोठा धोका टाळता येतो. ही लक्षणं कोणती आहे ती जाणून घेऊया.

युरिनमध्ये बदल

किडनीच्या बिघाडाचं सर्वात पहिलं लक्षण म्हणजे लघवीत होणारे बदल. अचानक लघवीचं प्रमाण कमी होणं किंवा लघवीला फेस येणं हे किडनीमधून प्रोटीन बाहेर पडत असल्याचं लक्षण असू शकतं.

शरीरावर सूज येणं

पाय, टाच किंवा चेहऱ्यावर अचानक सूज दिसून आली तर तीही किडनीच्या त्रासाची खूण आहे. शरीरात जास्त पाणी जमा होतं, म्हणून सूज येते.

सतत थकवा जाणवणं

किडनी नीट काम करत नसेल तर शरीरात लाल रक्तपेशी तयार करणारा हार्मोन कमी प्रमाणात निर्माण होतो. त्यामुळे नेहमी थकवा, कमजोरी जाणवते आणि शरीराचा उत्साह कमी होतो.

श्वास घेण्यास त्रास होणं

किडनीच्या आजारामुळे फुफ्फुसात पाणी साचू शकतं. त्यामुळे थोडी हालचाल केली तरी किंवा आडवं झोपल्यावरही श्वास घेण्यास त्रास होतो.

वारंवार उलटी आणि मळमळ

किडनी खराब झाल्यावर रक्तात घाण पदार्थ साठतात. त्यामुळे पोटात जळजळ, अन्नाची इच्छा कमी होणं, वारंवार उलटी होणं आणि तोंडात धातूसारखा विचित्र स्वाद जाणवतो.

त्वचेत खाज सुटणं

किडनी नीट काम करत नसल्याने शरीरातील टॉक्सिन बाहेर पडत नाहीत. त्यामुळे त्वचेवर सतत खाज सुटणं, कोरडेपणा दिसू लागतो. आजार जसजसा पुढे जातो तसतशी ही समस्या गंभीर होऊ लागते.

मेंदूवर परिणाम

किडनी फेल झाल्यावर त्याचा परिणाम मेंदूवरही दिसून येतो. यामध्ये गोंधळलेपणा, लक्ष केंद्रित करण्यात अडचण, स्मरणशक्ती कमी होणं अशा समस्या जाणवतात. ही स्थिती अधिक धोकादायक ठरू शकते.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत