Oral cancer symptoms: तोंडामध्ये 'हे' बदल दिसले तर सावध व्हा; तोंडाच्या कॅन्सरची लक्षणं असू शकतात

कॅन्सर हा एक जीवघेणा आजार आहे, ज्यामुळे दरवर्षी जगभरातील हजारो-लाखो लोकांचे प्राण जातात. कॅन्सरचे अनेक प्रकार आहेत, त्यापैकी तोंडाचा कॅन्सर सर्वसामान्य मानला जातो. तंबाखूचं सेवन करणाऱ्या लोकांमध्ये या आजाराचा धोका अधिक प्रमाणात असतो.

या आजाराच्या सुरुवातीला तोंडामध्ये काही लक्षणं दिसून येतता. तज्ज्ञांच्या म्हणण्यानुसार, जर याची लक्षणं वेळीच ओळखली तर या रोगापासून उपचार घेऊन मुक्तता मिळवता येते. याची लक्षणं काय आहेत ती जाणून घेऊया

तोंडात लाल किंवा पांढरे डाग

जर तोंडाच्या आतील भागात लालसर किंवा पांढरे डाग दिसत असतील आणि ते दीर्घकाळ बरे होत नसतील, तर हे लक्षण धोक्याचे ठरू शकते. अशा वेळी त्वरित तपासणी करून घेणे आवश्यक आहे.

सूज किंवा गाठ तयार होणं

तोंडाच्या कोणत्याही भागात गाठ तयार होणे किंवा सूज येणं ही बाब साधी नसते. विशेषत: वेळ जसा जातो तशी ही गाठ किंवा सूज वाढू लागली तर ती कॅन्सरकडे जाणारा इशारा असू शकतो.

बोलण्यात अडथळा येणं

बोलताना अडचण जाणवत असेल तर त्यामागे तोंडाच्या कॅन्सरची कारणं दडलेली असू शकतात. कॅन्सरचे पेशी वाढू लागल्यावर जीभ आणि जबड्याच्या स्नायूंवर परिणाम होतो. त्यामुळे आवाजात बदल होतो आणि बोलणे कठीण होते. यासोबत दात हलणे हेही एक लक्षण असू शकते.

अन्न चावण्यात त्रास

बर्‍याचदा लोक अन्न चावण्यातील अडचण दुर्लक्ष करतात, परंतु हे धोकादायक ठरू शकते. हा साधा त्रास नसून तोंडातील कॅन्सरची शक्यता दर्शवणारे लक्षण असू शकते.

कानात वेदना होणं

कानात दुखणं ही साधी गोष्ट असली तरी कोणत्याही कारणाशिवाय सतत होणाऱ्या वेदना हे तोंडाच्या कॅन्सरचं संकेत असू शकतं.

वजन कमी होणं

शरीराचं वजन वाढणं-घटणं हे आरोग्याविषयी बरेच काही सांगतं. जर कुठल्याही कारणाशिवाय वजन झपाट्याने कमी होऊ लागलं, तर तेही कॅन्सरचं एक लक्षण असू शकतं.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.