Serious illness signs: लघवीमधून लाल रंग दिसत असेल तर सावध व्हा; 'या' गंभीर आजाराचे संकेत असू शकतात

आपल्या शरीरात दिसणारे छोटे–छोटे बदल अनेकदा मोठ्या आजारांचे संकेत देतात. विशेषतः युरिनमध्ये बदल आरोग्याविषयी महत्त्वाची माहिती देतात. सामान्यतः लघवीचा रंग पारदर्शक किंवा फिकट पिवळा असतो. मात्र त्यात लालसर रंग दिसू लागला तर ते धोकादायक ठरू शकते, असे तज्ज्ञ सांगतात.

डॉ. जय वर्मा यांच्या मते, काही अन्नपदार्थ जसं की बीट, बेरीज किंवा काही औषधांचे सेवन यामुळे लघवीचा रंग लालसर होऊ शकते. पण जर सतत मूत्रात रक्त दिसत असेल, तर ही स्थिती हेमॅट्युरिया (Hematuria) म्हणून ओळखली जाते आणि ती गंभीर आजारांची चिन्हे असू शकते.

संभाव्य कारणं

• किडनी स्टोन- यामुळे मूत्रमार्गात जखम होऊन रक्त येऊ शकते.

• मूत्रमार्ग संसर्ग – संसर्गामुळे जळजळ आणि रक्त दिसू शकते.

• ब्लॅडर किंवा किडनी कॅन्सर – सुरुवातीच्या टप्प्यात लघवीतून रक्त येणं हे एक लक्षण असतं.

• किडनीचे आजार – किडनीचं कार्य व्यवस्थित न चालल्यास मूत्राचा रंग बदलतो.

• रक्त गोठण्याची समस्या – आतल्या जखमा किंवा ब्लड क्लॉटिंगमुळे रक्त दिसू शकते.

कधी घ्यावी डॉक्टरांची मदत?

तज्ज्ञांच्या मते, जर लघवीतील लालसरपणा दोन दिवसांत न गेला किंवा त्यासोबत वेदना, जळजळ, ताप, वजन कमी होणं किंवा वारंवार लघवी लागणं अशी लक्षणं दिसली तर तातडीने डॉक्टरांची तपासणी करून घेणं आवश्यक आहे.

यावर काय उपाय करू शकता?

• पुरेसे पाणी पिणं

• संतुलित आहार घेणं

• मद्यपान व जास्त मीठ टाळणं

• वारंवार होणारा UTI दुर्लक्षित न करणं

• वेळोवेळी आरोग्य तपासणी करणं

तज्ज्ञांचा सल्ला आहे की, युरिनमध्ये लालसरपणा दिसणे हे कधीही किरकोळ लक्षण मानू नये. योग्य वेळी तपासणी व उपचार केल्यास गंभीर आजारांपासून बचाव होऊ शकतो.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.