भारतातील महिलांमध्ये ब्रेस्ट कॅन्सरचं प्रमाण अधिक प्रमाणात दिसून येतं. ब्रेस्ट कॅन्सरनंतर महिलांमध्ये सर्वाधिक प्रमाणात दिसून येणारा कॅन्सर म्हणजे सर्वायकल कॅन्सर. तज्ज्ञांच्या म्हणण्यानुसार, जर याची तपासणी आणि निदान योग्य वेळी केलं तर यापासून जीव वाचवता येतो.

TOI ला डॉ. सहाना के. पी यांनी दिलेल्या माहितीनुसार, सर्व्हायकल कॅन्सर हा अशा काही कॅन्सरपैकी एक आहे ज्यासाठी प्रभावी, परवडणारी आणि उत्तम स्क्रीनिंग चाचणी उपलब्ध आहे.

चाचणी करणं महत्त्वाचं

सुमारे ७० ते ८० टक्के प्रकरणांचं मूळ हे हाय रिस्क एचपीव्ही म्हणजेच ह्यूमन पॅपिलोमाव्हायरस संसर्ग असतो. हा संसर्ग तुमच्या शरीरात कोणतीही लक्षणं न दाखवता राहू शकतो. परंतु नंतर तो प्री-कॅन्सर किंवा कॅन्सरमध्ये विकसित होतो. अशावेळी एचपीव्ही प्रतिबंध आणि वेळेवर चाचणी करणं महत्त्वाचं ठरतं.

पॅप स्मीअर ज्याला सामान्यतः पॅप टेस्ट म्हणतात. ही टेस्ट १९४० च्या दशकात विकसित करण्यात आली होती. यामध्ये गर्भाशयाच्या मुखातून पेशींची तपासणी केली जाते. यामध्ये काही असामान्य बदल असतील तर ते लगेच लक्षात येतात. लवकर निदान केल्याने उपचार सोपे होतात.

किती पद्धतीच्या असतात टेस्ट?

पॅप टेस्ट या दोन प्रकारे केल्या जातात. पहिली पारंपारिक पद्धत असून ज्यामध्ये सर्विक्सच्या पेशी गोळा केल्या जातात आणि स्लाईडवर ठेवल्या जातात. दुसऱ्या पद्धतीत लिक्विड बेस्ड सायटोलॉजी ज्यामध्ये एका विशेष ब्रशने पेशी गोळा केल्या जातात. त्यांना प्रयोगशाळेत पाठवून त्याची तपासणी केली जाते. ही पद्धत अधिक प्रगत मानली जाते.

का केली पाहिजे ही टेस्ट?

अनेक महिला ही टेस्ट करून घेत नाहीत. कारण त्यांना लक्षणं दिसत नसल्याने त्यांना याची गरज वाटत नाही. साधारणपणे २१ व्या वर्षापासून किंवा लैंगिकदृष्ट्या एक्टिव्ह झाल्यानंतर पॅप टेस्ट करण्याचा सल्ला दिला जातो. २१ ते ६५ वयोगटातील महिलांसाठी दर तीन वर्षांनी पॅप टेस्ट करण्याचा सल्ला देण्यात येतो.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.