कॅन्सरविरोधी नव्या लसी या निरोगी व्यक्तींना रोग होऊ नये म्हणून नाहीत तर ज्या रुग्णांचा कॅन्सरवर उपचार झालेला आहे, त्यांच्यात तो पुन्हा होऊ नये यासाठी विकसित केल्या जात आहेत, असं वैद्यकीय तज्ज्ञांनी स्पष्ट केलं आहे.

केरळ स्टेट आयएमएच्या संशोधन विभागाचे संयोजक आणि आयएमए कोचीच्या वैज्ञानिक समितीचे अध्यक्ष डॉ. राजीव जयदेवन यांनी सांगितलं की, “या उपचारात्मक कॅन्सर लसी (थेरप्यूटिक कॅन्सर व्हॅक्सिन्स) आहेत. त्यांचा उद्देश म्हणजे उपचारानंतर रोगाची पुनरावृत्ती रोखणं हा आहे. निरोगी लोकांमध्ये कॅन्सर होऊ नये यासाठी या लसींचा वापर होत नाही.”

शनिवारी गॅस्ट्रोइंटेस्टाइनल ऑन्कोलॉजी सोसायटीच्या (GIOS) दुसऱ्या वार्षिक परिषदेत बोलत होते.

कॅन्सर उपचारात नवी दिशा

डॉ. जयदेवन म्हणाले की, उपचारपद्धतीत सतत बदल होत असून लसीकरण हे आता इम्युनोथेरपीच्या स्वरूपात उपलब्ध झालं आहे. या लसींमध्ये ‘निओॲन्टिजेन थेरपी’ वापरली जाते. यात शरीराची स्वतःची रोगप्रतिकारशक्ती एक्टिव्ह होऊन कॅन्सरच्या पेशींना ओळखते आणि नष्ट करते.

परिषदेचा मुख्य विषय – कोलोरेक्टल कॅन्सर

तीन दिवस चालणाऱ्या या परिषदेत कोलोरेक्टल कॅन्सर (CRC) या आजारावर विशेष भर देण्यात आला आहे. हा आजार जागतिक पातळीवर झपाट्याने वाढतो आहे, असं आयोजकांनी सांगितलं.

वैयक्तिक उपचारांवर भर

या परिषदेचे संयोजक सचिव डॉ. अरुण आर. वारियर म्हणाले, “कॅन्सरवरील उपचार झपाट्याने बदलत आहेत. आता प्रत्येक रुग्णासाठी त्याच्या स्थितीनुसार वैयक्तिक उपचार करणं आवश्यक ठरत आहे.”

या परिषदेकरिता २०० हून अधिक कॅन्सरतज्ज्ञ, पचनतज्ज्ञ आणि इतर वैद्यकीय तज्ज्ञ एकत्र आले आहेत. ते कॅन्सर प्रतिबंध, तपासणी आणि पचारपद्धतीतील नव्या घडामोडींवर चर्चा करत आहेत.

कार्यशाळा आणि विशेष सत्र

या कार्यक्रमात शस्त्रक्रिया, किरणोपचार आणि जनुकशास्त्र या विषयांवर कार्यशाळा घेण्यात येत आहेत. त्याचप्रमाणे शस्त्रक्रियेशिवाय उपचारपद्धतींवर विशेष सत्र आयोजित करण्यात आले असून यात देश-विदेशातील ख्यातनाम तज्ज्ञ सहभागी होत आहेत, अशी माहिती आयोजकांनी दिली.