शरीराला रिचार्ज करण्यासाठी आणि मनाला शांत ठेवण्यासाठी झोप ही अत्यंत महत्त्वाची असते. दिवसभराच्या थकव्यापासून मुक्त होण्यासाठी आणि मेंदूला रिस्टार्ट करण्यासाठी रात्रीची झोप आवश्यक असते. झोप ही फक्त आराम देत नाहीतर शरीराची पुन्हा नैसर्गिक प्रक्रिया करून काम करायला सुरुवात करते. झोपेच्या वेळेस मेंदू दिवसभर जमा झालेल्या माहितीला व्यवस्थित करतो, तर शरीरातील हार्मोन्स, स्नायू आणि इम्यून सिस्टमची रिपेअरिंग होते. त्यामुळे सकाळी उठल्यानंतर शरीरात नवीन ऊर्जा निर्माण होते.

तज्ज्ञांच्या मते, रात्री सुमारे 7 तासांची झोप घेतल्यास इम्युनिटी वाढते, मेंदू चांगला कार्य करतो, फोकस वाढतो आणि मूडही फ्रेश राहतो. नीट झोपल्याने हार्ट हेल्थ आणि मेटाबॉलिझमही सुधारतो. नॅशनल स्लीप फाउंडेशन (NSF) आणि विविध आरोग्य संशोधन संस्थांच्या मते, प्रत्येक वयोगटानुसार झोपेची गरज वेगळी असते. नवजात शिशुपासून ते वृद्ध व्यक्तींपर्यंत झोपेचे प्रमाण शरीराच्या बदलत्या गरजेनुसार ठरते.

नवजात बाळांना दिवसभरात 14 ते 17 तास झोपेची गरज असते. चार ते अकरा महिन्यांच्या बाळांना 12 ते 15 तास झोप गरजेची असते. ज्यात दिवसभरातल्या लहान-लहान झोपेचाही समावेश होतो. एक ते दोन वर्षांच्या मुलांना 11 ते 14 तास झोप आवश्यक असते. तीन ते पाच वर्षांच्या प्री-स्कूल मुलांसाठी 10 ते 13 तास झोप उत्तम मानली जाते. सहा ते बारा वर्षांच्या स्कूल-गटातील मुलांना 9 ते 11 तास झोप आवश्यक असते.

किशोरवयीन म्हणजेच 13 ते 18 वर्षांच्या मुला-मुलींना दररोज 8 ते 10 तास झोप घेतली पाहिजे. तर 18 ते 25 आणि 26 ते 64 वर्षांच्या प्रौढ व्यक्तींना 7 ते 9 तास झोप पुरेशी ठरते. 65 वर्षांवरील वृद्ध व्यक्तींना 7 ते 8 तासांची झोप योग्य मानली जाते. कोणत्याही वयोगटातील व्यक्तींनी आपल्या झोपेची वेळ नियमित ठेवणे आणि आवश्यक तास झोप घेणे अत्यंत महत्त्वाचे आहे.