Raja Shivaji Show Cancel: रितेश देशमुखचा राजा शिवाजी या बहुचर्चित चित्रपटाच्या प्रदर्शनादरम्यान मुंबईत एक गोंधळाची घटना समोर आली आहे. प्रेक्षकांना कोणतीही पूर्वसूचना न देता अचानक शो रद्द करण्यात आल्याने मोठी तारांबळ उडाली. हा प्रकार दादरच्या भारतमाता टॉकीज येथे घडल्याचे समोर आले आहे.

चित्रपट १ मे रोजी प्रदर्शित झाल्यानंतर पहिल्याच दिवशी प्रेक्षकांकडून मोठा प्रतिसाद मिळाला होता. बॉक्स ऑफिसवरही या चित्रपटाने दमदार कामगिरी करत मराठी चित्रपटांच्या कमाईचे विक्रम मोडले. त्यामुळे वीकेंडला मोठ्या संख्येने प्रेक्षकांनी तिकीट बुकिंग केले होते.

मात्र, शो सुरू होण्याआधीच तो अचानक रद्द करण्यात आला. कोणतीही पूर्वकल्पना न दिल्याने थिएटरमध्ये उपस्थित प्रेक्षकांमध्ये नाराजी पसरली. अनेक प्रेक्षक वेळेआधी थिएटरमध्ये हजर होते, पण शो न लागल्याने त्यांचा संताप उफाळून आला. काही प्रेक्षकांनी व्यवस्थापनाकडे स्पष्टीकरण मागितले, मात्र समाधानकारक उत्तर मिळाले नसल्याचे त्यांनी सांगितले.

या प्रकारामुळे थिएटरबाहेर गोंधळाचे वातावरण निर्माण झाले. काही ठिकाणी प्रेक्षक आणि कर्मचाऱ्यांमध्ये वादही झाले. विशेष म्हणजे, शो रद्द होण्यामागचे कारण स्पष्ट करण्यात आले नसल्याने परिस्थिती आणखी चिघळली. व्यवस्थापकांनीही याबाबत हात वर केल्याचे सांगितले जात आहे.दरम्यान, अशाच प्रकारची घटना ठाण्यातील एका थिएटरमध्येही घडल्याची माहिती समोर आली आहे. तेथे तांत्रिक अडचणीमुळे शो रद्द करण्यात आल्याने प्रेक्षक नाराज झाले होते.

‘राजा शिवाजी’ या चित्रपटाबाबत प्रेक्षकांमध्ये प्रचंड उत्सुकता आहे. या चित्रपटात रितेश देशमुख सह जिनिलिया देशमुख, अभिषेक बच्चन, संजय दत्त, विद्या बालन, भाग्यश्री, महेश मांजरेकर यांसारखे कलाकार महत्वपूर्ण भूमिका साकारत आहेत.