Fashion Designer Arrested: कर्नाटकातील बेळगावी येथे सोशल मीडियावर श्रीमंत पुरुषांना जाळ्यात ओढून फसवणूक करणाऱ्या एका महिलेला पोलिसांनी अटक केली आहे. ही महिला आधी मैत्री करायची, नंतर प्रेमाचे नाटक करत पुरुषांना लॉजवर बोलावायची आणि योग्य संधी साधून त्यांची रोकड, सोने तसेच वाहने घेऊन पसार व्हायची. या प्रकारामुळे परिसरात खळबळ उडाली आहे.

पोलिसांनी अटक केलेल्या महिलेचे नाव  दीपा अवतागी (वय 33) असे आहे. ती मूळची कर्नाटकातील बागलकोट जिल्ह्यातील महालिंगपूर येथील रहिवासी असून व्यवसायाने फॅशन डिझायनर असल्याची माहिती समोर आली आहे. टिळकवाडी पोलीस ठाणे यांच्या पथकाने या प्रकरणाचा तपास करून तिला अटक केली.

तपासात उघड झाले की, ही महिला प्रामुख्याने इंस्टाग्राम आणि फेसबुक सारख्या सोशल मीडिया प्लॅटफॉर्मवर श्रीमंत आणि प्रभावशाली पुरुषांना टार्गेट करायची. सुरुवातीला ती मैत्री करून त्यांच्याशी गप्पा मारायची आणि हळूहळू त्यांचा विश्वास संपादन करायची. त्यानंतर प्रत्यक्ष भेटण्याचा प्रस्ताव देत ती त्यांना लॉज किंवा हॉटेलमध्ये बोलावायची.

पीडित व्यक्ती लॉजवर आल्यानंतर ती त्यांच्याशी काही काळ गप्पा मारून वातावरण सहज बनवायची. त्यानंतर एखाद्या कारणाने त्यांना अंघोळीसाठी किंवा फ्रेश होण्यासाठी बाथरूममध्ये पाठवायची. त्या दरम्यान ती खोलीत ठेवलेली रोकड, दागिने, बॅगा आणि इतर मौल्यवान वस्तू घेऊन पळून जायची. काही केसमध्ये तर ती पीडितांची कार घेऊनही पसार झाल्याचे समोर आले आहे.

इतक्यावरच हा प्रकार थांबत नव्हता. वस्तू घेऊन पळाल्यानंतर ती पीडितांना फोन करून पैसे मागायची. पैसे दिल्यास गाडी किंवा सामान परत देऊ, असे सांगून ती पुन्हा पैसे उकळण्याचा प्रयत्न करत असल्याचे तपासात समोर आले आहे. पैसे देण्यास नकार दिल्यास पोलीस तक्रार करून बदनामी करण्याची धमकीही ती देत असे.

या प्रकरणाचा तपास सुरू असताना पोलिसांना तिचा एक साथीदार असल्याचा संशय आहे. या साथीदाराचे नाव शिवानंद मतपेटी असे असून तो सध्या फरार आहे. त्याचा शोध घेण्यासाठी पोलिसांनी विशेष पथके तैनात केली आहेत. या हनीट्रॅप प्रकरणात आणखी किती लोकांची फसवणूक झाली आहे, याचाही तपास सध्या सुरू आहे.