Musician Death: भारतीय शास्त्रीय संगीतविश्वासाठी अत्यंत दुःखद बातमी समोर आली आहे. प्रख्यात तबला वादक उस्ताद साबिर खान यांचे वयाच्या ६६ व्या वर्षी निधन झाले. कोलकात्यातील एका खासगी रुग्णालयात त्यांनी अखेरचा श्वास घेतला. हृदयविकाराच्या झटक्यामुळे त्यांचे निधन झाल्याची माहिती समोर आली आहे. त्यांच्या निधनामुळे भारतीय शास्त्रीय संगीताच्या एका सुवर्ण पर्वाचा अंत झाल्याची भावना संगीतप्रेमींमधून व्यक्त केली जात आहे. त्यांच्या पश्च्यात त्यांची पत्नी आणि तीन मुलं असा परिवार आहे.

उस्ताद साबिर खान हे फर्रुखाबाद घराण्याचे प्रमुख आणि अत्यंत मानाचे कलाकार होते. तबल्याच्या दुनियेत त्यांनी स्वतःची वेगळी ओळख निर्माण केली होती. त्यांच्या तबल्याच्या ठेक्यांमध्ये परंपरा, शिस्त आणि भावनांचा अनोखा संगम अनुभवायला मिळत असे. त्यांनी आपल्या आयुष्यात अनेक दिग्गज कलाकारांसोबत रंगमंच गाजवला.

४ डिसेंबर १९५९ रोजी उत्तर प्रदेशातील रामपूर येथे उस्ताद साबिर खान यांचा जन्म झाला. बालपणापासूनच त्यांना संगीताचे संस्कार लाभले. आजोबा उस्ताद मसित खान आणि वडील उस्ताद करामतुल्ला खान यांच्या मार्गदर्शनाखाली त्यांनी तबल्याचे शिक्षण घेतले. पुढे त्यांनी आपल्या मेहनतीच्या जोरावर देश-विदेशात मोठी लोकप्रियता मिळवली.

उस्ताद अमजद अली खान, पंडित रविशंकर, उस्ताद बिस्मिल्ला खान, पंडित हरिप्रसाद चौरसिया आणि विदुषी गिरिजा देवी यांसारख्या महान कलाकारांसोबत त्यांनी अनेक संस्मरणीय मैफिली सादर केल्या होत्या. संगीत क्षेत्रातील त्यांच्या योगदानासाठी त्यांना अनेक प्रतिष्ठित पुरस्कारांनी गौरवण्यात आले होते.

उस्ताद साबिर खान यांनी केवळ कलाकार म्हणूनच नव्हे, तर गुरु म्हणूनही मोठे योगदान दिले. ‘उस्ताद करामतुल्ला खान म्युझिक सोसायटी’च्या माध्यमातून त्यांनी अनेक विद्यार्थ्यांना शास्त्रीय संगीताचे धडे दिले. त्यांच्या निधनानंतर संगीतविश्वातून शोक व्यक्त केला जात असून अनेक कलाकार आणि चाहत्यांनी त्यांना श्रद्धांजली अर्पण केली आहे.