First Photo From Ramayana Set:

प्रसिद्ध दिग्दर्शक नितेश तिवारी (Nitish Tiwari) यांच्या आगामी 'रामायण' (Ramayana Film) चित्रपटाची सध्या जोरदार चर्चा सुरू आहे. या चित्रपटामध्ये बॉलिवूड अभिनेता रणबीर कपूरसोबत साई पल्लवी आणि सनी देओल हे सेलिब्रिटी मुख्य भूमिकेत आहे. या चित्रपटाबाबत एक-एक अपडेट्स समोर येत आहेत. या चित्रपटाचे अपडेट जाणून घेण्यासाठी चाहते देखील उत्सुक आहेत. या चित्रपटाबाबत आता एक महत्वाची अपडेट समोर आली आहे. चित्रपटाचे शूटिंग सुरू झाले असून सेटवरून पहिला फोटो समोर आला आहे.

'ॲनिमल'च्या यशानंतर रणबीर कपूर 'रामायण' चित्रपटाच्या माध्यमातून प्रेक्षकांच्या भेटीला येणार आहे. हा चित्रपट रणबीरच्या करिअरमधील बिग बजेट चित्रपट असणार आहे. या चित्रपटात कथेपासून ते अप्रतिम व्हीएफएक्सपर्यंत बरेच काम केले जाणार आहे. त्यामुळे या चित्रपटाबाबत कलाकारांसोबत प्रेक्षकही खूपच उत्सुक आहे. नितेश तिवारीच्या 'रामायण'ची घोषणा झाल्यापासून रणबीर कपूर श्री रामाच्या भूमिकेत कसा दिसणार याची त्याच्या चाहत्यांमध्ये क्रेझ आहे.

अशातच अभिनेत्री आकृती सिंहने रामायण चित्रपटाच्या सेटवरील एक फोटो शेअर केला आहे. आकृती सिंहने हा फोटो शेअर करत कॅप्शनमध्ये लिहिले की, 'रामायण दिवस 1.' या चित्रपटाचा भव्य सेट फोटोमध्ये दिसत आहे. त्याचसोबत एक व्यक्ती चालताना दिसत आहे पण त्याचा चेहरा दिसत नाही. अशा परिस्थितीत हा फोटो रणबीर कपूरचा आहे की अन्य कोणाचा हे सांगणे कठीण आहे.

नितेश तिवारी यांच्या रामायण चित्रपटामध्ये रणबीर कपूर प्रभू रामाच्या भूमिकेमध्ये दिसणार आहे. साई पल्लवी माता सीतेच्या भूमिकेत, यश रावणाच्या भूमिकेत, सनी देओल हनुमानाच्या भूमिकेमध्ये दिसणार आहेत. त्याचसोबत लक्ष्मणाच्या भूमिकेमध्ये रवी दुबे, कैकयीच्या भूमिकेमध्ये लारा दत्ता, श्रुपनखाच्या भूमिकेमध्ये रकुल प्रीत सिंग दिसणार आहे. या चित्रपटामध्ये प्रभू रामाचे भाऊ भरतच्या भूमिकेमध्ये कोण दिसणार यावर चर्चा सुरू होती. अशामध्ये आता भरत हे पात्र मराठमोळा अभिनेता आदिनाथ कोठारे साकारणार आहे.