'बिग बॉस मराठी ५' चा विजेता गुलीगत किंग सूरज चव्हाणच्या घरी लवकरच चिमुकल्या पाहुण्याचे आगमन होणार आहे. अखेर सूरजची मानलेली बहीण म्हणजे अभिनेत्री जान्हवी किल्लेकरने एक खास व्हिडीओ शेअर करून ही आनंदाची बातमी चाहत्यांसोबत शेअर केली आहे. काही महिन्यांपासून सूरजची पत्नी संजना गरोदर असल्याच्या चर्चा सोशल मीडियावर रंगली होती. संजनाचे अनेक व्हिडीओ आणि फोटो व्हायरल झाले होते. आता अखेर जान्हवीने चोरओटी भरतानाचा व्हिडीओ शेअर करून गुडन्यूज दिली आहे.

जान्हवी अलिकडेच सूरजला भेटायला त्याच्या घरी गेली होती. तेव्हा तिने एक व्हिडीओ शेअर केला होता, त्यात संजनाचा बेबी बंप स्पष्ट दिसला आणि पुन्हा सूरज चव्हाण बाबा होणार असल्याची चर्चा रंगली. अशात आता अखेर जान्हवीने व्हिडीओ शेअर करून ही आनंदाची बातमी Confirmed केली.

व्हिडीओमध्ये तुम्ही पाहू शकता की, जान्हवी संजना आणि सूरजला ओवाळताना दिसत आहे. तिने संजनाची चोरओटी भरली. दोघांना भरपूर आशीर्वाद दिले. भेटवस्तू दिली. तसेच जान्हवीने सूरज- संजनाला प्रेमाने मिठी देखील मारली. जान्हवीने मार्च महिन्यात सूरजच्या बायकोची चोरओटी भरली. जान्हवी किल्लेकरने व्हिडीओच्या कॅप्शनमध्ये लिहिलं की, "मार्च महिन्यात भरलेल्या चोर ओटीचा व्हिडीओ आत्ता शेअर करतेय, कारण आत्ता Confirmed सांगायला काहीच हरकत नाही की, आपला सूरज लवकरच "बाबा " होणारे..."

जान्हवी किल्लेकरच्या व्हिडीओवर चाहते कमेंट्स आणि प्रेमाचा वर्षाव करत आहे. एकीकडे सूरज आणि संजनाला नवीन प्रवासासाठी शुभेच्छा देत आहेत, संजनासाठी काळजी व्यक्त करत आहे. तर दुसरीकडे सूरज-जान्हवीच्या भाऊ-बहिणीच्या नात्याचे कौतुक करत आहे. जान्हवीची पदोपदी सूरजला दिलेली साथ पाहून चाहते भारावून गेले आहेत. गुलीगत किंग सूरज चव्हाण आणि संजनाने २९ नोव्हेंबर २०२५ लग्नगाठ बांधली.