विश्वभूषण लिमये, सोलापूर

सोलापुरात दोन गटात तुंबळ हाणामारी झाल्याची घटना समोर आली आहे. भरचौकात रॉड, बॅट अन् दगडाच्या सहाय्याने एकमेकांना मारहाण करण्यात आली. या हाणामारीचा व्हिडीओ समोर आला असून तो सध्या सोशल मीडियावर व्हायरल होत आहे. या हाणामारीमध्ये ७ जण जखमी झाले आहेत. जखमींवर सध्या रुग्णालयात उपचार सुरू आहेत. या प्रकरणी सोलापूर पोलिसांनी दोन्ही गटातील आरोपींविरोधात गुन्हा दाखल केला आहे. पोलिस सध्या या प्रकरणाचा तपास करत आहेत.

मिळालेल्या माहितीनुसार, सोलापुरातील कोंतम चौकातील धाकटा राजवाडा परिसरात जुन्या भांडणाच्या वादातून तुफान राडा झाला. दोन गटात झालेल्या या तुंबळ हाणामारीचा व्हिडिओ सध्या सोशल माध्यमांवर मोठ्या प्रमाणात व्हायरल होत आहे. हातात रॉड, बॅट आणि दगडाच्या सहाय्याने झालेल्या या हाणामारीत दोन्ही गटातील सात जण जखमी झाले आहेत. या हाणामारीदरम्यान महिलांना देखील मारहाण करण्यात आल्याचे दिसत आहे.

हाणामारीची माहिती मिळताच सोलापूर पोलिसांनी घटनास्थळी धाव घेत परिस्थिती नियंत्रणात आणली. या प्रकरणी सोलापुरातील जोडभावी पोलिस ठाण्यात दोन्ही गटांकडून परस्पराविरोधात फिर्याद दाखल करण्यात आली होती. दोन्ही गटातील जवळपास १५ जणांच्या विरोधात या प्रकरणी गुन्हा दाखल करण्यात आला आहे.

तर सर्व जखमींवर सोलापुरातील शासकीय रुग्णालयात उपचार सुरू आहेत. या घटनेमुळे सोलापूरमध्ये खळबळ उडाली. जुन्या वादातून ही घटना घडली. पोलिस सध्या या प्रकरणाचा तपास करत आहेत.