मंगेश कचरे, बारामती

बारामतीमध्ये गावातील तरुणांच्या त्रासाला कंटाळून एका १६ वर्षीय मुलीने आत्महत्या केल्याची धक्कादायक घटना समोर आली आहे. बारामती तालुक्यातील कोऱ्हाळे खुर्दमध्ये ही घटना घडली आहे. हे तरुण लग्नासाठी दबाव करत कुटुंबीयांना जीवे मारण्याची वारंवार धमकी देत होते. या छळाला कंटाळून मुलीने राहत्या घरी गळफास लावून आत्महत्या केली. या प्रकरणी चौघांविरोधात गुन्हा दाखल करण्यात आला आहे. पोलिस या प्रकरणाचा तपास करत आहेत.

मिळालेल्या माहितीनुसार, बारामती तालुक्यातील कोऱ्हाळे खुर्द येथे १६ वर्षीय मुलीने गळफास घेऊन आत्महत्या केली. या मुलीने ८ एप्रिल रोजी राहत्या घरात आत्महत्या केली. तिला गावातील काही तरुण त्रास देत होते. वारंवर लग्नासाठी दबाव टाकत होते. या मानसिक त्रासाला ती कंटाळली होती. त्यामुळे तिने टोकाचे पाऊल उचलत तिने आयुष्य संपवलं.

आत्महत्या केलेल्या मुलीला काही दिवसांपासून विशाल दत्तात्रय गावडे आणि त्याचे मित्र प्रविण गावडे, शुभम गावडे आणि सुनील खोमणे यांच्याकडून मानसिक त्रास दिला जात होता अशी माहिती तिच्या कुटुंबियांनी दिली आहे. मुलीच्या वडिलांनी वडगाव निंबाळकर पोलिस ठाण्यात धाव घेत याप्रकरणी तक्रार दाखल केली. त्यांनी दिलेल्या तक्रारीनुसार, विशाल गावडे तिचा पाठलाग करत होता. तिच्यावर लग्नासाठी दबाव टाकत होता आणि नकार दिल्यास संपूर्ण कुटुंबाला जीवे मारण्याची धमकी देत होता.

तरुणांकडून सतत होणाऱ्या त्रासाला कंटाळून मुलीने आत्महत्येचा निर्णय घेतल्याचे कुटुंबियांचे म्हणणे आहे. बारामती तालुक्यातील वडगाव निंबाळकर पोलिस ठाण्यात मुलीच्या आत्महत्येप्रकरणी चौघांविरुद्ध गुन्हा दाखल करण्यात आला आहे. पोलिसांकडून या प्रकरणाचा पुढील तपास सुरू आहे. पोलिस सध्या आरोपींचा शोध घेत आहेत. या घटनेमुळे बारामतीत खळबळ उडाली आहे.