विजय पाटील, सांगली

सांगलीमध्ये लग्नाचे आमिष दाखवून महिलेवर बलात्कार केल्याची धक्कादायक घटना समोर आली आहे. याप्रकरणी सांगलीतील वंचित बहुजन आघाडीच्या बड्या नेत्याविरोधात गुन्हा दाखल करण्यात आला आहे. या घटनेमुळे सांगलीमध्ये खळबळ उडाली आहे. आरोपीने महिलेला मारहाण देखील केली. या प्रकरणाचा तपास पोलिसांकडून सुरू आहे.

मिळालेल्या माहितीनुसार, सांगलीच्या कवठेमहांकाळ तालुक्यातील वंचितचे जिल्हाध्यक्ष शंकर मानेवर कवठेमहांकाळ पोलिस ठाण्यात बलात्काराचा गुन्हा दाखल करण्यात आला आहे. शंकर मानेला कवठेमहांकाळ पोलिसांनी पहाटे राहत्या घरातून अटक केली. लग्नाचे आमिष दाखवून पीडितेवर वारंवार बलात्कार केल्याचा आरोप शंकर मानेवर आहे. कवठेमहांकाळ पोलिस ठाण्यात पीडित महिलेने फिर्याद दिल्यानंतर आरोपीविरोधात पोलिसांनी कारवाई केली.

पीडित महिलेस शंकर माने, त्याचा भाऊ, आणि पत्नी यांच्याकडून मारहाण करण्यात आल्याचा आरोप देखील आहे. भारतीय न्याय सहिंता २०२३ चे कलम ६४, ६९ नुसार शंकर मानेवर बलात्काराचा गुन्हा दाखल करण्यात आला आहे. सांगली आणि कवठे महांकाळ तालुक्यातील झुरेवाडी येथे वारंवार बलात्कार केल्याचा आरोप करण्यात आला आहे.

आरोपी शंकर मानेने लग्नाचे आमिष दाखवून पीडितेवर वारंवार जबरदस्तीने शारीरिक संबंध ठेवले आणि तिला गरोदर केले. या पीडितेल मुल देखील झाले. यासोबतच फिर्यादीने मुलाच्या कागदपत्रांसाठी कवठेमहांकाळ येथील कार्यालयात अर्ज केल्यावर आरोपी शंकर माने यांच्यासह शोभा माने, सिद्धू माने आणि सविता माने या चौघांनी मिळून पीडित महिलेला मारहाण केली. या घटनेमुळे सांगलीमध्ये खळबळ उडाली. पोलिस या प्रकरणाचा अधिक तपास करत आहेत.