Ulhasnagar Crime: उल्हासनगर हादरले! मध्यरात्री भरचौकात गोळीबाराचा थरार, दोघे गंभीर जखमी

उल्हासनगर शहरात बुधवारी रात्री उशिरा कौटुंबिक वादातून गोळीबाराची धक्कादायक घटना घडली. हिललाईन पोलिस ठाण्याच्या हद्दीतील कॅम्प पाचमधील साईनाथ कॉलनी परिसरात झालेल्या या घटनेत दोन जण गंभीर जखमी झाले असून त्यापैकी एका व्यक्तीची प्रकृती अत्यंत चिंताजनक आहे. या प्रकारामुळे परिसरात काही काळ भीतीचे वातावरण पसरले होते.

मिळालेल्या माहितीनुसार, आरोपी मोनू शेख याचा काही काळापासून योगेश मिश्रा यांच्याशी कौटुंबिक कारणावरून वाद सुरू होता. या वादातूनच आरोपीने बुधवारी रात्री योगेश मिश्रा यांच्यावर थेट गोळीबार केला. गोळी लागल्याने योगेश मिश्रा गंभीर जखमी झाले आहेत. तसेच या हल्ल्यात दुसऱ्या एका व्यक्तीवर तलवारीने प्राणघातक वार करण्यात आले. अचानक झालेल्या हल्ल्यामुळे साईनाथ कॉलनी परिसरात मोठा गोंधळ उडाला.

दरम्यान, गोळीबाराची माहिती मिळताच हिललाईन पोलिसांनी तातडीने घटनास्थळी धाव घेतली. पोलिसांनी घटनास्थळाचा पंचनामा करून पुरावे जमा केले. तसेच आरोपींचा शोध घेण्यासाठी विशेष पथके तयार करण्यात आली असून, फरार आरोपींच्या हालचालींवर लक्ष ठेवण्यासाठी परिसरातील सीसीटीव्ही फुटेज तपासण्याचे काम सुरू आहे.

गोळीबारात गंभीर जखमी झालेल्या योगेश मिश्रा यांना तातडीने ठाण्यातील खाजगी रुग्णालयात हलविण्यात आले असून त्यांची प्रकृती चिंताजनक असल्याचे डॉक्टरांनी सांगितले आहे. दुसऱ्या जखमी व्यक्तीवर स्थानिक रुग्णालयात उपचार सुरू आहेत. या घटनेमुळे उल्हासनगर शहरात खळबळ उडाली असून नागरिकांमध्ये भीतीचे वातावरण आहे. पोलिसांनी आरोपींविरोधात गंभीर गुन्ह्याची नोंद केली असून तपास अधिकाऱ्यांनी आरोपींना तातडीने अटक करण्यात येईल, असे आश्वासन दिले आहे.