Ulhasnagar : विनयभंगाच्या आरोपातून जेलमधून सुटताच उन्माद; तरुणीच्या घराबाहेर फटाके फोडत वाजवले ढोल ताशे

उल्हासनगर : उल्हासनगरात तरुणीचा विनयभंग केल्याप्रकरणी एकाला पोलिसांनी ताब्यात घेतले होते. काही दिवस जेलची हवा खाल्ल्यानंतर या आरोपीची जेलमधून सुटका झाली. जेलमधून सुटल्याबरोबरच या आरोपीने पुन्हा उन्माद घातल्याचे समोर आले आहे. बाहेर आल्यानंतर पीडित तरुणीच्या घराबाहेर जाऊन फटाके फोडले आणि ढोलताशे वाजविल्याचे समोर आले आहे. 

उल्हासनगरच्या कॅम्प २ मधील रमाबाई टेकडी परिसरात २७ एप्रिलच्या रात्री हंशू बिपिन झा, रोहित झा सोनमणी झा आणि बिट्टू सिताराम यादव यांनी एका घराचा दरवाजा तोडला. यानंतर घरात घुसत घरातील दोन तरुणींना बाहेर खेचलं आणि त्यांच्या अंगावरील कपडे फाडून विनयभंग केला, असा आरोप होता. याप्रकरणी उल्हासनगर पोलीस ठाण्यात गुन्हा दाखल करत आरोपींना उल्हासनगर पोलिसांनी अटक केली होती. 

जामिनावर सुटताच काढली मिरवणूक

या प्रकरणातील रोहित झा या आरोपीचा जामीन न्यायालयाने मंजूर केला. आधारवाडी कारागृहातून सुटल्यावर रोहितची मिरवणूक काढण्यात आली. इतकेच नाही तर त्याला रमाबाई टेकडी परिसरात आणण्यात आले. तिथे ज्या मुलीचा त्याने विनयभंग केल्याचा त्याच्यावर आरोप होता. तिच्या घरासमोर जाऊन फटाके फोडत ढोल ताशे वाजवत विकृत सेलिब्रेशन करण्यात आल्याची प्रकार घडला आहे. या प्रकारामुळे कुटुंबीय घाबरले आहे. 

पोलिसांचा धाक संपला का?

दरम्यान या प्रकाराचा व्हिडीओ व्हायरल झाला आहे. मात्र एखादा आरोपी जेलमधून सुटल्यावर फिर्यादीच्या घराबाहेर सेलिब्रेशन करत असेल, तर हा दहशत निर्माण करण्याचा प्रकार असून यामुळे उल्हासनगरचे पोलीस नेमके करतात काय? उल्हासनगरात पोलिसांचा धाक उरला आहे का? असा प्रश्न उपस्थित झालाय.