- चेतन व्यास

वर्धा जिल्ह्याच्या पुलगाव येथे सोनाराच्या सतर्कतेने मोठी घटना टळलीय. सकाळी ज्वेलरी दुकान उघडायला आलेल्या सोनाराची बॅग अज्ञात चोरट्याने पळवली. व्यापाऱ्याच्या लक्षात येताच त्याने पाठलाग करत बॅग चोरट्याकडून हिसकवली मात्र चोरटे दुचाकीने पसार झाले. ही घटना परिसरातील सिसिटीव्हीत कैद झालीय.

पुलगाव येथील महावीर चौकातील प्रमोद रामभाऊ काळे या सराफाच्या दुकानातील ही घटना आहे. सकाळी आठ वाजता दुकानसमोर एक पिवळा लेडीज गाऊन घालून एक युवक आला. त्याने दुकानातील कुलूपमध्ये फेविक्विक टाकत एक माचिसची काडी टाकली व तो निघून गेला. जेणेकरून दुकानदार आल्यावर त्याला कुलूप उघडायला वेळ लागेल.

दहा वाजता कपडे बदलून युवक त्याच ठिकाणी परत आला. दुकान मालक श्रेयस काळे हा दहा वाजताच्या सुमारास दुचाकीने बॅग घेऊन आला व बॅग दुचाकीवर लटकावून दुकानाचे कुलूप उघडत होता. मात्र दुकानाचे कुलूप हे उघडत नव्हते याचदरम्यान त्याची दुचाकीला लागून असलेली बॅग चोरट्याने संधीचा फायदा घेत पळवली.

बॅग पळवून युवक आपल्या साथीदारसोबत दुचाकीवरून जातं असतांना श्रेयसला बॅग पळविल्याचे लक्षात आले. श्रेयसने आरडाओरड करत चोरट्यांकडून बॅग हिसकावली मात्र चोरटे घटनास्थळावरून पसार झाले. या बॅगेत सोने व रोख असा एकूण 30 लाखांचा मुद्देमाल होता श्रेयस यांच्या सतर्कतेने माेठी चाेरीची घटना टळली. ही घटना परिसरातील सिसिटीव्हीत कैद झाली आहे.

Edited By : Siddharth Latkar