आयुष्यात कितीही कठीण परिस्थिती असली तरी त्यावर मात करुन जो व्यक्ती प्रयत्न करतो तो नक्कीच यशस्वी होतो. अपयश ही यशाची पहिली पायरी असते, असं म्हटलं जातं. त्यामुळे तुम्हाला जर अपयश आले तर खचून जायचं नाही. याच अपयशातून शिकून पुढे यशाची पायरी चढायची. असंच काहीसं शुभम कुमार यांनी केलं. शुभम कुमार आज एक आयएएस अधिकारी म्हणून कार्यरत आहेत. (Success Story)

शुभम कुमार हे लहानपणापासूनच खूप हुशार होते. त्यांना स्पर्धा परीक्षा देऊन सरकारी अधिकारी व्हायचे होते. मात्र, या काळात त्यांना अनेक अडचणींचा सामना करावा लागला. परंतु तरीही त्यांनी कायम प्रयत्न केले.

शुभम हे मूळचे बिहारच्या कटिराहचे रहिवासी.शुभम हे लहानपणापासूनच हुशार होते. त्यांनी पूर्णिया येथे शिक्षण घेतले. त्यानंतर कटिहार आणि त्यानंतर पाटणा येथून शिक्षण पूर्ण केले. शुभम यांना लहानपणापासूनच सरकारी अधिकारी व्हायचे होते. (Success Story Of IAS Shubham Kumar)

शुभम कुमार यांनी आयआयटी बॉम्बे येथून सिविल इंजिनियरिंगमध्ये बीटेक केलं. त्यानंतर त्यांनी शेवटच्या वर्षात यूपीएससी परीक्षेची तयारी सुरु केली. या काळात त्यांना एका कंपनीत इंटर्नशिपदेखील मिळाली होती. त्यानंतर त्यांना नोकरीसाठी ऑफरदेखील मिळाली होती. मात्र, त्यांना स्पर्धा परीक्षा द्यायची होती. हे त्यांचं ठरलं होतं. त्यामुळे ते प्लेसमेंट ड्राइवलादेखील गेले नव्हते.

शुभम कुमार २०१८ मध्ये पहिल्यांदा यूपीएससी परीक्षा दिली. परंतु ते अयशस्वी ठरले. त्यानंतर २०१९ मध्ये त्यांना २९० वी रँक मिळाली. त्यानंतर त्यांची निवड इंडियन डिफेंस अकाउंट सर्विसमध्ये झाली. परंतु त्यांना आयएएस अधिकारी व्हायचे होते. त्यांनी २०२० मध्ये पुन्हा परीक्षा दिली. यामध्ये त्यांना ऑल इंडियामध्ये १ रँक मिळाली. ते टॉपर होते.