पॅनकार्ड धारकांसाठी महत्वाची बातमी हाती आली आहे. आयकर विभागाने काही पॅनकार्ड धारकांविरोधात कारवाई करण्यास सुरुवात केली आहे. पॅनकार्डधारक अॅक्टिव्ह नसलेलं कार्ड वापरत असेल, तर या व्यक्तीस १०००० रुपयांचा दंड भरावा लागू शकतो. आयकर विभागाच्या या कारवाईमुळे पॅनकार्डधारकांची चिंता वाढली आहे.

पॅनकार्डचा उपयोग केवळ आयकर रिटर्न भरण्यासाठी केला जात नाही. तर बँकिंग, गुंतवणूक, प्रॉपर्टी खरेदी-विक्री, कर्ज काढणे आणि अन्य बाबींसाठी पॅनकार्डचा उपयोग केला जातो. तुमचं पॅनकार्ड इनअॅक्टिव्ह असेल. त्यानंतर व्यक्ती जाणूनबुजून किंवा अनावधानाने वापरात आणत असेल. तर आयकर विभाग कलम २७२ बी अंतर्गत १०००० रुपयांचा दंड आकारू शकते.

पॅनकार्ड हे आधारकार्डशी लिंक नसेल, तर पॅनकार्ड अॅक्टिव्ह राहत नाही. त्यामुळे पॅनकार्ड आधारकार्डशी लिंक करणे गरजेचे आहे. आधारकार्ड पॅनकार्डशी लिंक न केल्यास ते अॅक्टिव्ह राहत नाही. त्यामुळे सरकारने सर्वांना याबाबत आदेश दिले आहेत.

पॅनकार्ड अॅक्टिव्ह असल्याचं कसं ओळखाल?

तुमचं पॅनकार्ड अॅक्टिव्ह आहे की नाही? ही बाब तुम्ही घरबसल्या जाणून घेऊ शकतात. यासाठी तुम्ही आयकर विभागाच्या ई-फायलिंग वेबसाइटवर जाऊन Verify Your PAN हा पर्यायावर क्लिक करा. त्यानंतर तुमचा संपूर्ण पॅन क्रमांक, पूर्ण नाव, जन्म तारीख आणि मोबाईल क्रमांक नमूद करा. त्यानंतर एक ओटीपी तुमच्या मोबाईल क्रमांकावर प्राप्त होईल. त्यानंतर तुमचं पॅनकार्ड आधारकार्डाशी लिंक आहे का, याबाबत माहिती कळेल.

तुमचं पॅनकार्ड अॅक्टिव्ह नसेल, तर तुम्ही तातडीने आधारकार्ड लिंक करून घ्या. तुम्ही पॅनकार्ड आधारकार्डाशी लिंक केलं असेल, तर एकदा पडताळणी करून घ्या. तुमच्याकडे दोन पॅनकार्ड असेल, तर एक आयकर विभागाकडे सोपवा. तुम्ही यासाठी NSDL किंवा UTIISL च्या वेबसाइटवर संपूर्ण प्रक्रिया जाणून घेऊ शकता.