देशातील अर्ध्यापेक्षा जास्त लोकसंख्या ही प्रायव्हेट नोकरी करते.खाजगी नोकरी करणाऱ्यांनाही पेन्शन मिळते. प्रायव्हेट कंपनीत काम करणाऱ्या कर्मचाऱ्यांची पेन्शन कमी असते. यासाठी सरकारने काही नियम केले आहेत. दरम्यान, आता ही पेन्शन वाढण्याची शक्यता आहे. सरकार लवकरच खाजगी क्षेत्रात काम करणाऱ्या कर्मचाऱ्यांच्या बेसिक पेन्शनमध्ये वाढ करण्याची शक्यता आहे.

EPFO अंतर्गत बेसिक पेन्शन किती मिळते?

ईपीएफओअंतर्गत कर्मचारी पेन्शन योजना (ईपीएस-95) अंतर्गत सध्या बेसिक पेन्शन १००० रुपये दिली जाते. ही पेन्शन २०१४ मध्ये निश्चित करण्यात आली होती. यामध्ये आतापर्यंत कोणताही बदल करण्यात आलेला नाही. दरम्यान, आता यामध्ये बदल करण्याची शक्यता आहे. कर्मचारी पेन्शन योजनेत बेसिक पेन्शन ७,५०० करण्याची शक्यता आहे. खाजगी कर्मचाऱ्यांना सेवानिवृत्तीनंतर चांगली पेन्शन मिळावी यासाठी हा निर्णय घेण्यात येईल. यामध्ये महागाई भत्त्याचादेखील समावेश असेल.

पेन्शन वाढणार का? (Pension Increase)

सरकार ईपीएफओअंतर्गत किमान पेन्शनमध्येही वाढ करणार आहे. यावर आधीच काम सुरु झाले आहे. महागाईचा विचार करता १००० रुपयांची किमान पेन्शन ही खूप कमी आहे, असा युक्तिवाद अनेक कर्मचारी संघटनांनी केली. कामगार संघटनेने कर्मचारी पेन्शन योजनेत पेन्शनची किमान रक्कम ७५०० रुपयांपर्यंत वाढवण्याची मागणी बऱ्याच दिवसापासून केली जात होती.

दरम्यान, काही अहवालांनुसार पेन्शनमध्ये ७.५ पट वाढ करणार नसल्याचे सांगितले जात आहे. मात्र, यामध्ये २,५०० रुपयांपर्यंत वाढ करण्याचा विचार केला जाऊ शकतो. दरम्यान, अद्याप पेन्शनमध्ये किती वाढ होणार याबाबत कोणतीही माहिती समोर आलेली नाही.