MPSC Success Story: सलग १६ वेळा अपयश, शेवटी जिद्दीने क्रॅक केली MPSC; झाडू कामगार महिलेची लेक झाली क्लास १ अधिकारी

प्रत्येकाच्या आयुष्यात काही न काही संघर्ष असतो. तुम्हाला या संघर्षावर मात करत आपली स्वप्ने पूर्ण करायची असतात. स्वप्ने पू्ण करताना दिवसरात्र मेहनत करायची. परंतु अनेकदा नशीबापुढे कोणाचंही काही चालत नाही. अनेकदा अपयश येते परंतु कितीही अपयश आले तरीही हार मानायची नाही. तुम्ही जर जिद्द आणि चिकाटीच्या जोरावर मेहनत केली तर तुम्हाला यश हे नक्कीच मिळते. असंच यश उषा गंगाधर पवारला मिळालं.

झाडू कामगार महिलेची लेक होणार सरकारी अधिकारी

उषा गंगाधर पवार यांनी एमपीएससी परीक्षा पास केली आहे. त्यांना एकदा दोनदा नव्हे तर सलग १६ वेळा अपयश आले होते. परंतु त्यांनी हार मानली नाही. परिस्थितीशी दोन हात करत यश मिळवले. आता झाडू कामगार असलेल्या महिलेची लेक सरकारी विभागात मोठ्या पदावर काम करणार आहे.

उषा गंगाधर पवार यांचे बालपण खूप हालाखीच्या परिस्थितीत गेले. त्यांच्या आई झाडू कामगावर आहेत. कोपरगावच्या लेकीने हे यश मिळवले आहे. उषाची आई अहिल्याबाई या कोपरगाव नगरपालिकेत कंत्राटी पद्धतीने झाडू कामगार म्हणून काम करतात.

उषाच्या वडिलांचे सोळा वर्षांपूर्वी निधन झाले होते. ते ९ वर्षे अर्धांगवायुच्या आजारामुळे अंथरुणाला खिळले होते. त्यांचे चार बहिणी आणि एक मोठा भाऊ असे कुटुंब होते. वडील गेल्यानंतर संपूर्ण घराची जबाबदारी आईवर पडली. खूप कमी वयात त्यांनी खूप काही सोसलं.

उषाच्या तिन्ही बहि‍णींची लग्न झाले. त्यांच्या भावाने बूट पॉलिश करुन घराला आर्थिक हातभार लावला. गरीब कुटुंबातून आलेल्या उषाने मात्र एमपीएससी परीक्षा देण्याचा निर्णय घेतला. त्यांनी त्या अनुषंगाने प्रयत्नदेखील केले. सुरुवातीला सलग १६ वेळा अपयश मिळाले परंतु त्यांनी हार मानली नाही.

क्लास १ पदाला गवसणी

उषा यांनी सातवीपर्यंतचे शिक्षण कोपरगावच्या नगरपालिका शाळेत झाली. त्यांनी इंग्रजी विषयात पदवी मिळवली. त्यानंतर पदव्युत्तर शिक्षण घेतले. यानंतर स्पर्धा परीक्षेची तयारी करण्यासाठी ती पुण्याला गेली. अनेकदा तिने परीक्षा दिली. गेल्या १० वर्षात तिने १६ वेळा परीक्षा दिली. सर्व परीक्षांमध्ये अपयश आले. पुढे पुण्यात खर्च भागत नव्हता म्हणून संगमनेर येथे मैत्रिणीसोबत राहू लागली.लायब्ररीत जाऊन अभ्यास केला. शेवटी त्यांच्या मेहनतीचे यश झाले. एमपीएससी परीक्षेत अनुसुचित जाती संवर्गातून १४वी रँक प्राप्त केली. क्लास १ पद मिळण्याची शक्यता आहे.