अजय सोनवणे 

मनमाड (नाशिक) : कांद्याच्या भावात होणारी सततची चढ उतार यामुळे कांदा उत्पादक शेतकरी देशोधडीला लागला आहे. कांदा प्रश्नी कायम स्वरूपी तोडगा काढावा; या मागणीसाठी नाशिकच्या चांदवडमध्ये संतप्त कांदा उत्पादक शेतकऱ्यांनी कृषी दिनाचे औचित्य साधून कांदा क्रांती आंदोलन छेडले आहे.

कांद्याला चांगला दर मिळत नसल्याने कांदा उत्पादक शेतकऱ्यांना नुकसान सहन करावे लागले. या प्रश्नावर तोडगा काढण्यासाठी डॉ. श्याम पगार यांच्या नेतृत्वाखाली कांदा क्रांती आंदोलनाचा एल्गार पुकारण्यात आला आहे. कांद्याच्या दराबाबत शासनाला जाग आणण्यासाठी चार दिवसांचे अन्न त्याग लाक्षणिक उपोषण सुरू केले आहे. मोठ्या प्रमाणावर (Chandwad) कांदा उत्पादक शेतकरी आंदोलनात सहभागी झाले आहेत. 

शासन विरोधात घोषणाबाजी 

कांद्याला उत्पादन खर्चाच्या आधारित स्थिर हमी भाव द्यावा. अन्यथा कांद्यावर लावण्यात आलेली निर्यातबंदी उठवावी, आदींसह विविध मागण्या यावेळी करण्यात आल्या. यावेळी आंदोलनाच्या ठिकाणी शासनाच्या विरोधात जोरदार घोषणाबाजी करण्यात आली.