Akola News : नव्या कायद्यानुसार अकोल्यात पहिला गुन्हा दाखल; पोलिसांनी घेतले ताब्यात

अक्षय गवळी 

अकोला : आजपासून तीन नवे फौजदारी कायदे लागू झाले आहेत. नव्या कायद्यानूसार अकोल्यात पहिला गुन्हा दाखल झाला. अकोल्यातल्या बोरगांव मंजू पोलीस ठाण्यात नव्या कायद्यानूसार हा पहिला गुन्हा दाखल झाला आहे. नव्या २६९ कलमानुसार गुन्हा दाखल करण्यात आला आहे.

देशात आजपासून तीन नवीन फौजदारी कायदे लागू झाले आहेत. संसदेत नव्याने मंजूर करण्यात आलेल्या कायद्यामध्ये अनेक बदल करण्यात आले असून जुन्या भारतीय दंड संहितामध्ये ५११ कलम होती. मात्र नव्याने तयार करण्यात आलेल्या भारतीय न्याय संहितेत ३५८ कलम आहे. आता फसवणुकीसाठी कलम ४२० ऐवजी ३१६ कलम वापरले जाणार आहे. तर  खुनासाठी कलम ३०२ ऐवजी १०१ वापरले जाणार आहेत.

नितीन जानकीराम गवई (Akola) या बोरगाव मंजू गावातील रामजीनगर भागातल्या व्यक्तीवर हा गुन्हा दाखल करण्यात आला. नितीन गवईवर अनेक गुन्हे दाखल आहे. तो न्यायालयात सतत गैरहजर राहत असून फरार झाला होता. पोलीस काँस्टेबल आनंद चव्हाण यांच्या तक्रारीवरून हा गुन्हा दाखल करण्यात आला. देशात आजपासून हा नवीन कायदा लागू झाल्यानंतर अकोल्यात पहिला गुन्हा दाखल झाला आहे. गुन्हा दाखल करण्यात आल्यानंतर नितीन गवईला नव्या कलमानुसार फरार असल्याच्या कलमाखाली अटक करण्यात आली असल्याची माहिती बोरगाव मंजू पोलिसठाण्याचे (Police) पोलीस निरीक्षक मनोज केदार यांनी दिली आहे.