Manvat Bajar Samiti : गतवर्षीच्या तुलनेत सव्वा लाख क्विंटलची आवक वाढली; मानवत बाजार समितीकडून ५ लाख क्विंटल कापूस खरेदी

मानवत (परभणी) : मानवत येथील कृषी उत्पन्न बाजार समितीच्या छत्रपती शिवाजी महाराज यार्डात कापूस हंगाम २०२३-२४ मध्ये लिलावाद्वारे जुलैपर्यंत व्यापाऱ्यांनी शेतकऱ्यांकडून ५ लाख क्विंटल कपाशीची खरेदी केल्याची नोंद बाजार समितीकडे करण्यात आली आहे. मात्र शेतकऱ्यांना हंगामाच्या शेवटपर्यंत कापूस भाववाढीची अपेक्षा होती. परंतु मिळेल त्या दरातच कापूस विक्री करावी लागली. 

गतवर्षीच्या खरीप हंगामात (Kharip Hangam) मानवत तालुक्यात एकूण २३ हजार ७६३ हेक्टरवर कपाशीची लागवड करण्यात आली होती. नोव्हेंबरपासून बाजार समितीच्या यार्डात (Bajar Samiti) लिलावाद्वारे कापसाच्या खरेदी  विक्रीला सुरुवात झाली. यात पहिल्या दिवशी कापसाला सरासरी ७ हजार ४०० रुपये प्रति क्विंटल इतका दर मिळाला होता. यानंतर कापसाच्या दरात 100 ते १५० रुपयांची घसरण दिसून आली. शेतकऱ्यांकडून कापूस भाववाढीची अपेक्षा व्यक्त होत होती. मात्र पूर्ण हंगाम झाला तरी कापसाने आठ हजारांचा देखील टप्पा ओलांडला नाही. त्यामुळे शेतकरी निराश झाला.

दरम्यान नवीन खरीप हंगाम सुरु होण्यापूर्वी शेतीसाठी लागणार खर्च पाहता शेतकऱ्यांनी कापूस विक्रीस काढला होता. यावेळी मिळेल त्या दरात कापूस विक्रीस शेतकरी तयार झाला होता. या दरम्यान जुलै महिन्यापर्यंत मानवत बाजार समितीकडून पाच लाख क्विंटल तर सीसीआयकडून २१ हजार क्विंटल कापूस खरेदी करण्यात आला आहे. गतवर्षीच्या तुलनेत खरेदी केलेला कापूस अधिक आहे.