Wardha News : पाच दिवसांची डेडलाईन, सोयाबीन नुकसानीचे पंचनाम्यासाठी अधिकारी पाेहचले बांधावर

- चेतन व्यास

Wardha News : सोयाबीनचे झालेल्या नुकसानीची पंचनामे पाच दिवसात पूर्ण करण्याचे आदेश जिल्हाधिकारी यांनी दिले आहेत. त्यानूसार वर्धा जिल्ह्यात महसूल व कृषी विभागाने संयुक्तरित्या पंचनामे करण्यास प्रारंभ केला आहे. (Maharashtra News)

यंदा सोयाबीन पिकावर मोठ्या प्रमाणात बुरशीजन्य रोगासह येलो मोजॅक, मुळकूज, खोडकूजचा प्रादुर्भाव झालाय. यामुळे सोयाबीनच्या उत्पादनात घट होणार असून शेतकऱ्यांना मोठ्या प्रमाणात आर्थिक फटका बसणार आहे.

सोयाबीन पिकांचे झालेल्या नुकसानीचा तातडीने पंचनामा करून आर्थिक मदतीची मागणी सगळीकडे केली जातं होती. त्यातच राज्य सरकारने नुकसानीचे तातडीने पंचनामे करण्याचे आदेश दिले.

शासनाचे आदेश प्राप्त होताच वर्धेच्या जिल्हाधिकाऱ्यांनी संयुक्त पंचनामे करण्याचे आदेश दिले. त्यानूसार कार्यवाहीस प्रारंभ झाला आहे. दरम्यान जिल्ह्यातील अधिकाऱ्यांसह कर्मचाऱ्यांना पाच दिवसात पंचनामे पूर्ण करण्याच्या सूचना देण्यात आल्या आहेत.

महसूल विभागाने कोकण, नाशिक विभाग, धुळे, पुणे, सातारा, सांगली, भंडारा व गोंदिया वगळून इतर ठिकाणी सोयाबीनचे नुकसान झालेल्या भागात विमा संरक्षित क्षेत्राचा अंतर्भाव असल्यामुळे विम्याची मदत वेळेत करणे शक्य व्हावे आणि त्यांना मोठ्या प्रमाणावर दिलासा मिळावा म्हणून प्राधान्याने संयुक्त पंचनामे करण्याच्या सूचना जिल्हाधिकारी यांना दिल्या आहेत.

यानुसार जिल्ह्यातील येलो मोझॅक, मूळकुज आणि खोडकुज याचा प्रादुर्भाव झालेल्या क्षेत्राचे संयुक्त पंचनामे तातडीने करण्याच्या दृष्टीने जिल्हा प्रशासनाने बैठक आयोजित केलीय. बैठकीत सर्व अधिकाऱ्यांना संयुक्त पंचनामे करण्याच्या सूचना देत पंचनामे करायला सुरवात देखील झाली आहे.

Edited By : Siddharth Latkar