NCB Raids In Pune : 'नार्कोटिक्स' चे पुणे जिल्ह्यात दोन ठिकाणी छापे, मोठा अंमली औषधीसाठा जप्त

Pune News : पुणे जिल्हातील शिरूर व जुन्नर येथे मुंबई नार्कोटिक्स विभागाचे छापे टाकत मोठा अंमली औषध साहित्य जप्त केला आहे. मिडगुलवाडी येथे तब्बल 174 किलो तर नारायणगाव येथे सुमारे 26 किलो अल्प्राझोलम (alprazolam) जप्त करण्यात आले आहे अशी प्राथमिक माहिती सूत्रांकडून मिळत आहे. या कारवाईची एनसीबीने अत्यंत गोपनीयता बाळगली हाेती. (Maharashtra News)

ही कारवाई मुंबई येथील नार्कोटिक्स विभागाने केल्याचे समजते. पुणे जिल्ह्याच्या शिरूर तालुक्यातील मिडगुलवाडी व जुन्नर तालुक्यातील पिंपळगाव तर्फे नारायणगाव येथे मोठी कारवाई झाल्याची चर्चा दाेन्ही गावात पसरली.

या पथकाने अंमली पदार्थ सापडल्यानंतर या शेडला सील ठाेकले. शिरूर तालुक्यातील मिडगुलवाडी व जुन्नर तालुक्यातील पिंपळगाव येथे पत्र्याचे शेड मध्ये हे सुरु होते. यामध्ये ड्रग्स साहित्य तयार करण्यात येत होते. हे शेड भाड्याने घेतल्याची माहिती स्थानिकांकडून मिळत आहे.

दरम्यान, मुंबई नार्कोटिक्सच्या पथकाने शिरूर व जुन्नर तालुक्यात कारवाईबाबत गोपनीयता बाळगली होती. सुत्रांच्या माहितीनुसार या कारवाईत मोठ्या प्रमाणावर अल्प्राझोलम आणि इतर कच्चा माल सापडला आहे.

अल्प्राझोलम हे मानसिक विकारांसाठी वापरले जाते. हे गुंगीकारक असल्याचे तज्ज्ञांकडून समजते. अल्प्राझोलम मुळे विशेषत: वयस्क लोकांमध्ये, स्मृति संबंधीत समस्या, पेंग, संभ्रम निर्माण होऊ शकतो, शरीराच्या हालचालींवरील नियंत्रण यामुळे सुटण्याची शक्यता आहे.

Edited By : Siddharth Latkar