Banana Price: केळीला मिळतोय उच्‍चांकी दर; आवक कमी

जळगाव : केळी बाजारभावाचा आलेख गेल्‍या महिनाभरापासून दररोज उंचावत आहे. यामुळे केळी उत्‍पादक शेतकरीला (Farmer) चांगला दर मिळत आहे. गुणात्मक दर्जाच्या केळी (Banana) मालाला २ हजार ८०० ते ३ हजार रुपये बाजारभाव प्राप्त होत आहे. (Live Marathi News)

रावेर बाजार समितीच्या केळी भावापेक्षा २०० ते ३०० रुपये जास्त भाव अदा करून केळी मालाची खरेदी सुरू आहे. पाच- सहा वर्षांपासून हिवाळ्यात केळी बाजारभावाची होणारी पडझड; या सर्वांमुळे कांदेबाग व पिलबाग केळीची गतवर्षी अपेक्षीत लागवड झाली नाही. यामुळे केळीची आवक कमी आहे.

गतवर्षी मार्च महिन्यात वाढलेला सनस्ट्रोक पाहता व मे-जूनमध्ये उतीसंवर्धित रोपांच्या उशिरा झालेल्या उपलब्धतेमुळे यंदा रावेर, यावल, मुक्ताईनगर, चोपडा व बऱ्हाणपूर जिल्ह्यासह आंध्रप्रदेश, गुजरात, नांदेड व सोलापूर भागातही केळीमालाची उपलब्धता नाही.

दररोज रावेर तालुक्यातून निघणाऱ्या १५ ते २० ट्रक केळी मालाचे भाव वाढले आहेत. रावेर बाजार समितीच्या केळी बाजारभावात १ हजार ४४५ रुपयांपासून दररोज ४० ते ८० रुपये यादरम्यान दर वधारत आहेत. आज २४०० रुपये प्रतिक्विंटल भाव घोषित करण्यात आला होता.