VIDEO : पुराच्या पाण्यात ट्रॅक्टरसह चालक गेला वाहून, थरारक घटना मोबाइल कॅमेऱ्यात कैद

मागील दोन ते तीन दिवसांपासून विदर्भात अतिमुसळधार पाऊस पडत आहेत. पावसामुळे नद्या-नाल्यांना पूर आला असून अनेक ठिकाणी पूरस्थिती निर्माण झाली आहे. गोंदिया जिल्ह्यातील देवरी तालुक्यातील बाघनदीला देखील पूर आलाय. त्यामुळे शिलापूर- पुराडा मार्गावरील पूल पाण्याखाली गेलाय. अशातच बाघनदीच्या पुरात ट्रॅक्टर वाहून गेल्याची घटना घडली.

सुदैवाने ट्रॅक्टरचालक कृष्णा मारोती वल्थरे (वय ३० रा पद्मपुर) पुराच्या पाण्यातून वाचला आहे. ही थरारक घटना मोबाइल कॅमेऱ्या कैद झाली आहे. मिळालेल्या माहितीनुसार, शेतीच्या कामासाठी सदर ट्रैक्टर रोजंदारीच्या महिलांना सोडायला गेला होता. पुलावरुन पुराचे पाणी जात असतांना सुद्धा चालकाने अती आत्मविश्वासाने पुराच्या पाण्यात ट्रॅक्टर नेले.

शिरपूरच्या मनोहर सागर धरणाचे वक्र दरवाजे उघडण्यात आल्यामुळे पाण्याच्या पातळीत वाढ झाली होती. यामध्ये ट्रॅक्टर वाहून गेले. विशेष म्हणजे देवरी पोलीस स्टेशन चे कर्तव्यदक्ष पोलीस निरीक्षक प्रवीण डांगे यांनी तालुक्यातील पूर परिस्थितीची पाहणी केली होती. सदर घटनास्थळी अनेक वर्षापासून पुलाची मागणी केली जात असून लोकप्रतिनिधी याकडे सर्रास दुर्लक्ष करीत असल्याचे परिसरातील लोकांचे म्हणणे आहे.