Pandharpur News: भीमेची पातळी वाढली; पात्रातल्या मंदिरात 3 महाराज अडकले, पाहा थरारक व्हिडिओ

पंढरपूर: संपूर्ण राज्यामध्ये पावसाने धुमाकूळ घातला असून पंढरपूर येथील भीमा नदीच्या पात्रात असलेल्या महादेव मंदिराला देखील पुराच्या पाण्याने वेढा घातलेला आहे. त्यामुळे पंढरपूर तालुक्यातील गुरसाळे या ठिकाणी तीन साधू महंत पुराच्या पाण्यात अडकून बसले आहेत. राज्यात पावसाने थैमान घातले आहे, यामुळे अनेक भागांना पुराचा फटका बसला आहे.

पंढरपुरात देखील भीमा नदीच्या पात्रात असणाऱ्या महादेव मंदिराला पुराचा वेढा बसला आहे. यावेळी मंदिरात पूजा करण्यासाठी गेलेले तीन साधू आता या ठिकाणी अडकून पडले असल्याची माहिती समोर आली आहे. हे मंदिर नदीच्या पात्रात आहे. यावेळी अचानक पाण्याची पातळी वाढल्याने हे तीनही साधू मंदिरातच अडकून पडले. सोलापूर जिल्हा आपत्ती व्यवस्थापनाची टीम या साधूंना बचावासाठी पंढरपूर तालुक्यातील गुरसाळे या ठिकाणी रवाना झाली आहे. हे साधू गेल्या काही तासापासून पुराच्या पाण्यात अडकून पडले आहेत.