Thane News: ठाण्यातील कोपरी पूल ८ दिवस वाहतुकीसाठी बंद; सॅटिस प्रकल्पाच्या गर्डर बसविण्याचे काम सुरू|VIDEO

ठाणे पुर्व स्थानक परिसरातील वाहतूक कोंडीची समस्या सोडविण्यासाठी ‘स्थानक परिसर वाहतूक सुधारणा प्रकल्प’ (सॅटीस ) प्रकल्प राबविण्यात येत असून या प्रकल्पात रेल्वे मार्गिकेच्या दोन्ही बाजूला उभारण्यात आलेल्या खांबांवर गर्डर बसविण्याचे काम प्रलंबित होते. या कामासाठी रेल्वे विभागाने हिरवा कंदील दाखविला असून या कामामुळे सॅटिस प्रकल्पातील मोठा अडथळा दूर झाला आहे. २६ जुलै ते ३ ऑगस्ट या कालावधीत हे काम करण्यात येणार आहे. या कामासाठी वाहतूक पोलिसांनी ठाणे पश्चिम आणि पुर्व बाजूला जोडणाऱ्या जुन्या कोपरी पुलावरील वाहतूक आठ दिवस ठराविक वेळेत बंद ठेवण्याचा निर्णय घेऊन तशी अधिसुचना काढली आहे.

रेल्वे मार्गिकेच्या दोन्ही बाजूला उभारण्यात आलेल्या खांबांवर गर्डर बसविण्याचे काम २६ जुलै ते ३ ऑगस्ट या कालावधीत करण्यात येणार आहे. या कामादरम्यान, वाहतूक कोंडी होऊ नये यासाठी वाहतूक शाखेचे पोलिस उपायुक्त पंकज शिरसाट यांनी वाहतूक बदल लागू केले आहेत. यानुसार कोपरी सर्कल ते भास्कर कट दरम्यान दोन्ही बाजूच्या मार्गिकेवरील वाहतूक पुर्णपणे बंद ठेवली जाणार आहे. हि अधिसुचना २६ ते २७ जुलै, २७ ते २८ जुलै आणि २९ ते ३० जुलै या दि‌वशी दुपारी २ ते सकाळी ११ वाजेपर्यंत तर, २८ ते २९ जुलै, ३० ते ३१ जुलै, १ ते २ ऑगस्ट, २ ते ३ ऑगस्ट आणि ३ ते ४ ऑगस्ट या कालावधीत रात्री ८ ते दुपारी १२ वाजेपर्यंत जुना कोपरी पुल वाहतूकीसाठी बंद ठेवण्यात येणार आहे