सिन्नरमध्ये मतदानावेळी वाद; अजित पवारांच्या उमेदवाराच्या समर्थकावर स्प्रे हल्ला, २ गटात तुफान हाणामारी|VIDEO

नाशिक: येथील सिन्नरमध्ये मतदानादरम्यान मोठा गोंधळ उडाल्याची माहिती समोर आली आहे. राष्ट्रवादी काँग्रेस अजित पवार गटाच्या उमेदवाराच्या समर्थकावर स्प्रेने हल्ला केल्याचा धक्कादायक प्रकार घडला आहे. या हल्ल्यानंतर परिसरात तणाव निर्माण झाला असून दोन गटांत जोरदार हाणामारी झाली.

या संपूर्ण घटनेचा व्हिडिओदेखील समोर आला असून सोशल मीडियावर तो व्हायरल झाला आहे. हल्ल्यात एक पोलिस कर्मचारी जखमी झाल्याची माहिती मिळत आहे. सध्या पोलिसांनी तपास सुरू केला असून घटनास्थळी मोठा बंदोबस्त तैनात करण्यात आला आहे.

मिळालेल्या माहितीनुसार, मतदानादरम्यान किरकोळ वाद वाढत जाऊन दोन्ही गट आमनेसामने आले. त्याचवेळी एका समर्थकावर स्प्रेने हल्ला करण्यात आला. घटनेनंतर काही काळ गोंधळाचे वातावरण निर्माण झाले. सिन्नरमध्ये भाजप आणि राष्ट्रवादी अजित पवार गट हे एकमेकांच्या विरोधात लढत आहे. सिन्नर हा मंत्री माणिकराव कोकाटे यांचा बालेकिल्ला असून अनेक वर्षांपासून ते तेथून निवडून येतात. तसेच सोमवारी (1डिसेंबर) रोजी मुख्यमंत्री देवेंद्र फडणवीसांनी या ठिकाणी सभा घेतली होती.