Ashadhi Wari: विठू नामाच्या गजरात श्री.संत मुक्ताई पालखीचं पंढरपूरकडे प्रस्थान|VIDEO

जळगाव: आषाढी एकादशीच्या वारीसाठी श्री संत मुक्ताई पालखी सोहळ्याने आज पंढरपूरच्या दिशेने प्रस्थान केले. पालखी सोहळा कोथळी, मुक्ताईनगरातून पंढरपूरच्या दिशेने मार्गस्थ झाला. पालखी सोहळा प्रस्थान करतेवेळी हरिनामाच्या जयघोषाने अवघी मुक्ताईनगरी दुमदुमली होती. दरम्यान, परंपरेनुसार जुन्या मंदिरातून पालखी निघाली.

वारकऱ्यांच्या उपस्थितीत संत मुक्ताईच्या पादुका पंढरपूरला ३३ दिवसांचा ७५० किलोमीटरचा पायी प्रवास तसेच वारी दरवर्षी आषाढी एकादशीला विठ्ठल रखुमाईच्या भेटीसाठी पंढरपुरात प्रथम प्रवेशाचा मान ज्या संतश्रेष्ठ माऊलीच्या दिंडीला दिला जातो, त्या संत मुक्ताईंच्या दिंडीला तीन शतकांपेक्षा अधिक वर्षांची परंपरा लाभली आहे. जळगाव जिल्ह्यातील कोथळी येथील संत मुक्ताई संस्थानाच्या वतीने ही दिंडी दरवर्षी काढण्यात येते. दिंडीचे यावर्षीचे हे ३१६ वे वर्ष होते. आळंदीतून निघणारी संत ज्ञानेश्वरांची दिंडी, देहूतून निघणारी संत तुकोबांच्या दिंडी एवढेच महत्त्व जळगाव जिल्ह्यातून निघणाऱ्या संत मुक्ताईच्या दिंडीला देखील आहे.