Nashik : नाशिमध्ये पावसाचा फटका! निफाड रेल्वेस्थानकाबाहेर ३ ते ४ फुटांपर्यंत पाणी, वाहन चालकांचे हाल | VIDEO

नाशिक जिल्ह्यातील निफाड रेल्वेस्थानक परिसरात गेल्या काही तासांपासून सुरू असलेल्या मुसळधार पावसामुळे संपूर्ण परिसर ३ ते ४ फुट पाण्याखाली गेला आहे. परिणामी, प्रवासी, स्थानिक नागरिक आणि वाहनचालकांना प्रचंड अडचणींचा सामना करावा लागत आहे.रेल्वेस्थानकाच्या बाहेरील रस्ते जलमय झाले असून, दुचाकी व चारचाकी गाड्या अर्धवट पाण्यात अडकलेल्या स्थितीत दिसून येत आहेत. अनेक वाहनांची इंजिन बंद पडल्याने वाहनचालकांना हाताने गाड्या ढकलत असल्याचं चित्र पाहायला मिळत आहे.

प्रवाशांना स्टेशनकडे जाण्यासाठी गुडघ्यापर्यंत किंवा कमरेपर्यंत पाण्यातून वाट काढावी लागत आहे. पावसामुळे रेल्वेस्थानक परिसरात चिखल, गाळ साचल्याने वाहतूक व्यवस्था विस्कळीत झाली आहे.स्थानिक प्रशासन आणि आपत्कालीन यंत्रणांकडून मदतकार्य सुरू करण्यात आलं असलं तरी अजूनही परिस्थिती नियंत्रणात आलेली नाही. हवामान खात्याने निफाडसह नाशिक जिल्ह्यात पुढील २४ तासात अजून मुसळधार पावसाचा इशारा दिला आहे. त्यामुळे नागरिकांनी गरज असल्याशिवाय बाहेर न पडण्याचं आवाहन करण्यात आलं आहे.