Mumbai News: मुंबईच्या सांताक्रुझमध्ये अपघाताचा थरार; भरधाव बाईकच्या धडकेत एकाचा जागीच मृत्यू, VIDEO

मुंबई – सांताक्रुझ पश्चिम येथील एसएनडीटी कॉलेजसमोर एक दुर्दैवी अपघात घडला असून, भरधाव बाईकने दिलेल्या जोरदार धडकेत एक पायी चालणारा जागीच ठार झाला आहे. मृत व्यक्तीची ओळख गणेश लखन शाह (वय 39) अशी झाली असून, ते रस्ता क्रॉस करत असताना हा अपघात घडला. भरधाव वेगाने येणाऱ्या बाईकने त्यांना जबर धडक दिली, ज्यामुळे ते गंभीर जखमी झाले होते. तात्काळ उपचारासाठी रुग्णालयात नेण्यात आले, मात्र डॉक्टरांनी त्यांना मृत घोषित केले. या प्रकरणी सांताक्रुझ पोलिसांनी तात्काळ गुन्हा दाखल करून कारवाई सुरू केली. सीसीटीव्ही फुटेजच्या आधारे तपास करत बाईकस्वार आरोपी किनन मिसकिटा (वय 21) याला जुहू कोळीवाडा परिसरातून अटक करण्यात आली आहे. किनन मिसकिटा हा जुहू कोळीवाडा परिसरात वास्तव्यास असून, अपघात नेमका कशामुळे घडला, याचा तपास सांताक्रुझ पोलिसांकडून सुरू आहे.