लोकलसह एक्स्प्रेस गाड्यांनाही विलंब; कल्याण स्थानकात येणाऱ्या गाड्या १ ते दीड तास उशिराने

मुलुंड आणि कांजूरमार्ग रेल्वे स्थानकांदरम्यान सिग्नल यंत्रणेत बिघाड झाल्याने मध्य रेल्वेचे वेळापत्रक पूर्णपणे विस्कळीत झाले आहे. या तांत्रिक बिघाडाचा फटका लोकल गाड्यांसह एक्स्प्रेस गाड्यांनाही बसला असून, सर्वच गाड्या उशिराने धावत आहेत. त्यामुळे कामावरून घरी परतणाऱ्या चाकरमान्यांसह हजारो प्रवाशांचे मोठे हाल होत आहेत.

या बिघाडामुळे कल्याण रेल्वे स्थानकात येणाऱ्या गाड्या सुमारे एक ते दीड तास उशिराने धावत असल्याने स्थानकात प्रवाशांची गर्दी वाढू लागली आहे. गाड्या वेळेवर उपलब्ध होत नसल्याने प्रवाशांना स्थानकात ताटकळत थांबावे लागत आहे. विशेषतः संध्याकाळच्या गर्दीच्या वेळेत प्रवाशांना मोठ्या गैरसोयीचा सामना करावा लागत आहे.

रेल्वे प्रशासनाकडून स्थानकांवर उद्घोषणांच्या माध्यमातून प्रवाशांना माहिती दिली जात असून, सहकार्य करण्याचे आवाहन करण्यात येत आहे. सिग्नल यंत्रणेतील बिघाड दूर करून रेल्वे सेवा हळूहळू पूर्वपदावर आणण्याचे प्रयत्न रेल्वे प्रशासनाकडून सुरू आहेत.