Maratha Reservation: आरक्षण दिलं तर तुमच्यासोबत, नाही तर...; मराठा आंदोलकांचा अशोक चव्हाण यांना इशारा, VIDEO

मुंबई : भाजप खासदार अशोक चव्हाण यांना एका कार्यक्रमात मराठा आंदोलकांनी आरक्षणाबाबत जाब विचारला. अशोक चव्हाण यांच्या भोकर विधानसभा मतदार संघातील मुगट या गावी एका कार्यक्रमात मराठा आंदोलकानी जाब विचारला. आरक्षण देण्यासाठी इतका वेळ का लागतो? आमच्या योद्धाची प्रकृती खालावत आहे. मराठा आरक्षणाचा मुद्दा लवकरात लवकर सोडवा, अशी विनंती मराठा आंदोलकांनी अशोक चव्हाण केलीय.

आरक्षण वेळेत दिलं तर विधानसभेत तुमच्यासोबत, नाही तर तुमच्या विरोधात असे खडे बोल आंदोलकांनी चव्हाण यांना सुनावले आहेत. तुम्ही आरक्षणासाठी काय केलं? याचं उत्तर देखील आंदोलकांनी अशोक चव्हाण यांना विचारलं. काल रात्री मुगट या गावात कार्यक्रमासाठी अशोक चव्हाण गेले होते. यावेळी हा प्रकार घडला. दरम्यान अशोक चव्हाण यांच्या भोकर मतदार संघात सातत्याने मराठा आंदोलकांकडून चव्हाण कुटुंबीयांना विरोध होतोय .