नाशिकच्या देवळा परिसरात धुमाकूळ घालणारा बिबट्या अखेर जेरबंद|VIDEO

नाशिकच्या देवळा तालुक्यातील विठेवाडी परिसरात धुमाकूळ घालणा-या बिबट्याला जेरबंद करण्यास वनविभागाला यश आले आहे. विठेवाडी साखर कारखाना परिसरात हा बिबट्या लपलेला असतांना कारखान्याच्या सुरक्षा रक्षकाला तो दिसताच त्यानं वनविभागाला याची माहिती दिल्यानंतर पिंजरा लावण्यात आला. त्यात बिबट्या जेरबंद झाल्याने परिसरातील नागरिकांनी सुटकेचा निश्वास टाकला आहे. संपूर्ण राज्यात गेल्या काही महिन्यांपासून बिबट्यांनी हैदोस घातला आहे. नागरिकांमध्ये मोठ्या प्रमाणात भीतीचे वातावरण निर्माण झालेय. नाशिकमध्ये देखील बिबट्यांच्या संख्येमध्ये लक्षणीय वाढ झाली आहे. शहरासह ग्रामीण भागात बिबट्याने धुमाकूळ घातला आहे. शेकडोंचे प्राण बिबट्यांच्या हल्ल्यामध्ये गेले असून प्रशासनाने तत्काळ कार्यवाही करावी अशी मागणी भयग्रस्त नागरिक करत आहे.