Gold Price Hike: लक्ष्मीपुजनाच्या आधी सोनं महागलं तरी सराफ बाजारात झुंबड का? VIDEO

संजय महाजन, साम टीव्ही

दिवाळीचा सण अवघ्या काही तासांवर येऊन ठेपला असताना जळगावच्या सुवर्णनगरीत सोन्या-चांदीच्या बाजारात चांगलीच लगबग पाहायला मिळत आहे. साडेतीन मुहूर्तापैकी एक मानल्या जाणाऱ्या लक्ष्मीपूजनाच्या मुहूर्तानिमित्त सोने-चांदी खरेदीसाठी नागरिकांची पसंती दिसून येते आहे. महालक्ष्मीच्या सोन्या-चांदीच्या आकर्षक मूर्तींसह कॉईन आणि दागिन्यांची खरेदी करण्यासाठी सुवर्ण दुकाने आणि प्रतिष्ठानांमध्ये ग्राहकांचा ओघ अखंड सुरू आहे.

मात्र, मागील वर्षाच्या तुलनेत यंदा सोन्या-चांदीच्या दरात तब्बल विक्रमी वाढ झाली आहे. मागील वर्षी सोन्याचा दर 80 हजार रुपयांच्या घरात होता. तर यंदा तो 1 लाख 31 हजारांवर पोहोचला असून तब्बल 51 हजार रुपयांनी वाढ झाली आहे. तर चांदीचा दर मागील वर्षी 96 हजार रुपये होता. परंतु सध्या तो 78 हजारांनी वाढून तब्बल 1 लाख 74 हजार रुपये प्रति किलो इतका झाला आहे.

या भाववाढीच्या पार्श्वभूमीवर गुंतवणूकदार वर्गाने मात्र, सोन्या-चांदीतील गुंतवणूक वाढविली आहे. अनेक ग्राहक सणासुदीच्या शुभमुहूर्ताचा फायदा घेत लहान प्रमाणात गुंतवणूक करण्यावर भर देत आहेत. लक्ष्मीपूजनासाठी महालक्ष्मीच्या चांदीच्या मूर्ती, सोने-चांदीचे नाणे, तसेच शुभचिन्हांच्या वस्तू खरेदीला विशेष मागणी आहे. शहरात सणाचा उत्साह चांगलाच ओसंडून वाहत असून, सोन्याच्या दरातील वाढ असूनही जळगावची सुवर्णनगरी पुन्हा एकदा चमकू लागली आहे.