धक्कादायक! भाजप आणि अजित पवार गटाचे कार्यकर्ते भिडले; गोळीबारात एक जण गंभीर जखमी

राज्यात सर्वत्र निवडणुकीची रणधुमाळी सुरू आहे. या निवडणुकीदरम्यान काही ठिकाणी कार्यकर्त्यांमध्ये हाणामारीच्या घटना घडल्या आहेत. धुळे महानगरपालिकेतही दोन गटात राडा झाला. धुळे महापालिकेच्या निवडणुकीत भाजप आणि राष्ट्रवादी अजित पवार पक्षाच्या दोन गटांमध्ये एकमेकांवर झालेल्या हल्ल्यादरम्यान बंदुकीतून गोळीबार झाल्याचं पोलीस तपासात निष्पन्न झालं आहे. यात एक जण गंभीर जखमी झाला असून खासगी रुग्णालयात त्यावर उपचार सुरू आहेत.

बंदुकीतून झालेल्या गोळीबारानंतर जखमीच्या पोटात अद्यापही फायर झालेली गोळी तशीच आहे. ऑपरेशन करून गोळी बाहेर काढण्याची डॉक्टरांतर्फे प्रक्रिया सुरू आहे. या हल्ल्याबाबत देवपूर पोलीस ठाण्यात गुन्हा दाखल करण्यात आला आहे.

हल्ला प्रकरणानंतर पोलीस ऍक्शन मोडमध्ये आहेत. आठ आरोपींविरोधात देवपूर पोलीस ठाण्यात गुन्हा दाखल तर त्यातील तिघांना पोलिसांनी अटक केली. तर एका आरोपीवर रुग्णालयात उपचार सुरू आहे.