'तू खूप क्यूट आहेस' म्हणाला अन्...; स्कूल बसचालकाचं 9 वर्षांच्या मुलीसोबत धक्कादायक कृत्य|VIDEO

माधव सावरगावे, साम टीव्ही

छत्रपती संभाजीनगर: स्कूल बस चालकाने ९ वर्षाच्या विद्यार्थिनीसोबत विनयभंग केल्याची संतापजनक घटना छत्रपती संभाजीनगरमध्ये घडलीय. ३० जुलै रोजी घडलेल्या घटनेप्रकरणी ३० वर्षीय स्कूल बस चालक गणेश संपत म्हस्के याच्यावर मुकुंदवाडी पोलिस ठाण्यात गुन्हा दाखल करण्यात आला. त्यानंतर त्याची न्यायालयीन कोठडीत रवानगी करण्यात आली आहे.

शहरातील एका खाजगी शाळेत चौथीच्या वर्गात शिकणारी ९ वर्षाची मुलगी ३ वर्षापासून व्हॅनने ती जाते. ३० जुलै रोजी दुपारी २ वाजता व्हॅनमधील सर्व मुले उतरल्यानंतर घरापासून काही अंतरावर व्हॅन थांबवत गणेशने तिचा हात पकडला. तू खूप क्युट आहेस, उद्या आपण दोघे फिरायला बाहेर जाऊ, तू घरी तुझ्या आईवडिलांना सांग शाळेतून येण्यास उशीर होणार आहे, असे म्हणाला.

घाबरलेली मुलगी थांबा आल्यावर घरी गेली. सायंकाळी आई कामावरून घरी परतल्यावर तिने रडत हा प्रकार सांगितला. त्यानंतर तिच्या आईवडिलांनी पोलिस ठाण्यात धाव घेतली. हा संतापजनक प्रकार ३० जुलै रोजी घडल्यावर त्यावर ३१ जुलै रोजी कारवाई करण्यात आली. मात्र, शहर पोलिसांकडून या गुन्ह्याची माहिती लपवण्यात आली. त्यामुळे शाळेला पाठीशी घालण्याचा काही प्रयत्न पोलिस करत होते का, असा संशय निर्माण होत आहे.