BJP - Shinde Sena : महापालिका निवडणूक निकालानंतर मोठी घडामोड; भाजप-शिंदेसेना युती तुटण्याची शक्यता

एकसंध शिवसेना फुटीनंतर पहिल्यांदाच झालेल्या ठाणे महापालिका निवडणुकीत एकनाथ शिंदेंच्या शिवसेनेने भरघोस यश मिळवलं. तर भाजपला अपेक्षित यश मिळू शकलेलं नाही. शिंदेसेनेनं ७५ जागांवर विजय मिळवून सर्वात मोठा पक्ष ठरला. तर युतीत असलेल्या भाजपला अवघ्या २८ जागांवरच समाधान मानावं लागलं. पण येत्या काही दिवसांत मोठी घडामोड घडणार असल्याची चर्चा आहे. शिंदेंच्या बालेकिल्ल्यात भाजप आणि शिंदेसेनेची युती तुटण्याची शक्यता व्यक्त केली जात आहे.

ठाण्यात शिंदेसेनेचीच हवा असल्याचे महापालिका निवडणुकीच्या निकालातून स्पष्ट झालं. मुंबईत सर्वात मोठा पक्ष असलेल्या भाजपकडं शिंदेसेनेने महापौरपद हवं आहे, अशी इच्छा व्यक्त केली असतानाच, ठाण्यात भाजपनं काहीशी आक्रमक भूमिका घेतली आहे. योग्य मान सन्मान मिळाला नाही तर वेगळा विचार करण्यात येईल, असे भाजप आमदार संजय केळकर म्हणाले. उचित सन्मान न मिळाल्यास विरोधी बाकावर बसू, असा सूचक इशाराही केळकरांनी दिलाय. सत्तेवर अंकुश ठेवणेही महत्वाचे असते, वेगळा विचार करू, असेही केळकर म्हणाले.