Old Is Gold उमेदवारीचा भाजपचा फाॅर्म्युला ठरला, त्या नगरसेवकांना पुन्हा संधी|VIDEO

पुणे महापालिका निवडणुकीच्या पार्श्वभूमीवर भाजपने उमेदवारी वाटपाचा फॉर्म्युला निश्चित केला आहे. २०१७ मध्ये निवडून आलेल्या स्टँडिंग नगरसेवकांना पुन्हा संधी देण्याचा निर्णय भाजपने घेतल्याची माहिती विश्वसनीय सूत्रांनी दिली आहे. भाजपने पुण्यातील सर्व विधानसभा मतदारसंघांचा आढावा घेत जुने, अनुभवी आणि संघटनात्मक ताकद असलेल्या नगरसेवकांना संधी देण्यावर भर दिला आहे. त्यानुसार सुमारे १०० उमेदवारांची प्राथमिक यादी फायनल करण्यात आली असून यामध्ये माजी नगरसेवकांची नावे निश्चित झाल्याची माहिती सूत्रांकडून मिळते.

२०१७ च्या महापालिका निवडणुकीत भाजपचे ९९ नगरसेवक निवडून आले होते, तर एका नगरसेवकाने भाजपला पाठिंबा दिला होता. त्यानंतर विधानसभा निवडणुकीच्या काळात ठाकरे गटातील ५ नगरसेवकांनी भाजपमध्ये प्रवेश केला होता. या पार्श्वभूमीवर भाजपने यंदा अधिक आक्रमक रणनीती आखली असून १२५ जागा निवडून आणण्याचा दावा पक्षाकडून केला जात आहे.

तयार झालेली उमेदवारांची यादी भाजपचे आमदार आणि मुख्यमंत्री देवेंद्र फडणवीस यांच्याकडे सादर करण्यात येणार असल्याची माहिती आहे. दरम्यान, जुन्या नगरसेवकांसोबतच नवीन चेहऱ्यांना भाजप कोणत्या मतदारसंघात संधी देणार, याकडे राजकीय वर्तुळाचं लक्ष लागलं आहे.