Badlapur Crime: आरोपीला शाळेसमोरच फाशी द्या, बदलापूरकरांमध्ये प्रचंड संताप, पाहा VIDEO

नामांकित शाळेतील दोन चिमुकल्या विद्यार्थिनींवर तेथील सफाई कर्मचाऱ्याने अत्याचार केल्याची घटना उघडकीस आल्यानंतर बदलापूरकरांमध्ये संतापाची लाट उसळली आहे. सकाळी सुरू झालेले आंदोलन पाच तास उलटून गेले तरी सुरूच होते. सुरुवातीला शाळेच्या समोरच शेकडो पालकांनी आंदोलन केले. आरोपीला आमच्या ताब्यात द्या, शाळा प्रशासनाविरोधात कारवाई करा, कानाडोळा करणाऱ्या पोलिसांवर कारवाई करा, अशी मागणी पालकांनी केली. त्यानंतर काही तासांतच या आंदोलनाचे लोण सर्वत्र पसरले. सर्व नागरिक या घटनेच्या निषेधार्थ रस्त्यावर उतरले होते. तर रेल्वे स्थानकातही हजारो प्रवासी आणि नागरिक एकत्र आले आणि रुळांवर आंदोलन केले. या रास्तारोकोमुळं रेल्वे सेवाही ठप्प झाली.

दुसरीकडे महिलांमधून संतप्त प्रतिक्रिया व्यक्त होत आहेत. या आरोपीला आमच्या ताब्यात द्या, आम्ही काय शिक्षा द्यायची ते बघून घेऊ, असा संताप व्यक्त केला जात आहे. साहेब, आम्हाला एक वेळ लाडकी बहीण योजना नसली तरी चालेल, पण सुरक्षित बहीण योजना पाहिजे, असे पोस्टर झळकावत थेट मुख्यमंत्र्यांकडे न्यायाची मागणी केली. आरोपीला शाळेसमोरच फासावर लटकवा, अशी मागणीही महिलांनी केली.