MI VS DC : मुंबई इंडियन्सची धमाकेदार सुरुवात, दिल्ली कॅपिटल्सला चारली धूळ; शेवटच्या चेंडूवर विजयी षटकार लगावत जिंकला सामना

WPL 2024 Mumbai Indians vs Delhi Capitals:

महिला प्रीमियर लीगचा दुसरा हंगाम २३ फेब्रुवारी पासून सुरु झाला आहे. या हंगामाचा पहिला सामना मुंबई इंडियन्स आणि दिल्ली कॅपिटल्स या दोन संघात झाला. या दोन्ही संघामध्ये झालेल्या रोमहर्षक सामन्यात मुंबई इंडियन्सने बाजी मारली. (Latest Marathi News)

या सामन्यात दिल्लीच्या संघाने मुंबई इंडियन्सला १७१ धावांचं आव्हान दिलं. यानंतर दिल्लीने दिलेल्या आव्हानाचा पाठलाग करताना मुंबई इंडियन्सने २० षटकात ६ गडी गमावत १७३ धावा ठोकत सामना जिंकला. मुंबई इंडियन्सच्या सजीवन सजनाने विजयी षटकार लगावत सामना खिशात टाकला.

सजीवन सजना बनली स्टार

मुंबई इंडियन्स आणि दिल्ली कॅपिटल्स या दोन्ही संघामध्ये रोमहर्षक सामना झाला. मुंबई इंडियन्सला दोन चेंडूत पाच धावा हव्या होत्या. चेंडू एलिस कॅप्सीच्या हातात होता. यानंतर विसाव्या षटकाच्या पाचव्या चेंडूवर हरमनप्रीत कौर ५५ धावांवर बाद झाली.

याआधी सलामीवर यास्तिका भाटियाने ५७ धावांची खेळी खेळली. या सामन्याच्या शेवटच्या चेंडूवर सजीवन सजनाने षटकार लगावत मुंबई इंडियन्सला सामना जिंकून दिला. एका चेंडूवर पाच धावांची गरज असताना सजीवनने विजयी षटकार लगावत सामना जिंकून दिला.

कर्णधाराने सजीवनचं तोंडभरून कौतुक

सामन्यानंतर मुंबई इंडियन्सची कर्णधार हरमनप्रीत कौरचं तोंडभरून कौतुक केलं. फिल्डिंग करताना सजनाला भरपूर बोलणे ऐकावे लागले. तिने सामन्यादरम्यान कॅप्सीचा झेल सोडला होता. पण शेवटच्या चेंडूवर सजीवन सजनाने षटकार लगावत सर्वांचं मन जिंकलं.

रोमहर्षक सामन्यात विजयी षटकार लगावल्याने मैदानातील क्रिकेट चाहत्यांनी उभे राहून टाळ्यांच्या कडकडात कौतुक केलं. मुंबई इंडियन्स आतापर्यंत धावांचा पाठलाग करताना पराभूत झाली नाही. आजही सामना जिंकून इतिहास रचला.