Vaibhav Suryavanshi : पदार्पणात खळबळ माजवणाऱ्या वैभव सूर्यवंशीला मटण आणि पिझ्झा खाण्यास बंदी, कारण काय?

राजस्थान रॉयल्स विरुद्ध लखनऊ सुपर जायंट्स या सामन्याच्या माध्यमातून १४ वर्षीय वैभव सूर्यवंशीने आयपीएलमध्ये पदार्पण केले. सर्वात कमी वयात आयपीएलमध्ये पदार्पण करण्याचा विक्रम वैभवने कालच्या सामन्यामध्ये केला. सलामीसाठी मैदानात उतरल्यावर त्याने पहिल्याच चेंडूवर षटकार मारला. पदार्पणात दमदार खेळी करत वैभवने सर्वांना प्रभावित केले.

यशस्वी जयस्वालसह वैभव सूर्यवंशी राजस्थानकडून सलामीसाठी मैदानात उतरला. वैभवने इम्पॅक्ट प्लेयर म्हणून कालचा सामना खेळला. शार्दुल ठाकूरच्या ओव्हरमध्ये आयपीएलमधला पहिला चेंडू खेळताना त्याने मोठा षटकार मारला. २० चेंडूंमध्ये ३४ धावा करुन तो माघारी परतला. त्याचा स्ट्राईक रेट १७० होता. त्याने काल दोन चौकार आणि तीन षटकार मारत राजस्थानला चांगली सुरुवात करवून दिली.

आयपीएलपर्यंत पोहोचण्याचा वैभव सूर्यवंशीने खूप मेहनत घेतली. नियमित ट्रेनिंगससह त्याने आहारावर देखील नियंत्रण ठेवले. डाएट प्लॅननुसार वैभवला बऱ्याच गोष्टींपासून लांब राहावे लागले. वैभवचे प्रशिक्षक मनीष ओझा यांनी त्याच्या प्रवासाबद्दल माहिती दिली. त्यांनी टाइम्स ऑफ इंडियाला दिलेल्या माहितीनुसार, वैभवला मटण आणि पिझ्झा खायला खूप आवडत होते. पण क्रिकेटसाठी वैभवने हे पदार्थ खाणे टाळले. यावरुन अवघ्या १४ वर्षांचा वैभव सूर्यवंशी खेळाविषयी किती समर्पित आहे यांचा अंदाज येतो.

वैभव सूर्यवंशीच्या खेळीचे अनेकजण चाहते केले आहे. कालच्या सामन्यात कॉमेंट्री बॉक्समध्ये बसलेले समालोचक वैभवचे कौतुक करत होते. सोशल मीडियावर वैभव चर्चेचा विषय बनला आहे. गुगलचे सीईओ सुंदर पिचाई देखील वैभव सूर्यवंशीचे चाहते बनले आहेत. त्यांनी एक्सवर एक खास पोस्ट करत वैभवला शुभेच्छा दिल्या.