Team India: टीम इंडियाच्या स्टार फलंदाजाची कारकिर्द संपली? Asia Cup पाठोपाठ World Cup स्पर्धेलाही मुकणार..

Asia Cup 2023: भारतीय संघासाठी हे वर्ष अतिशय महत्वाचं आहे. कारण यावर्षी भारतीय संघाला आशिया चषक आणि आयसीसी वनडे वर्ल्ड कप २०२३ स्पर्धा खेळायची आहे. या स्पर्धा तोंडावर असताना भारतीय संघाला एकापाठोपाठ एक मोठे धक्के बसताना दिसून येत आहे.

संंघातील खेळाडू दुखापतीमुळे संघाबाहेर होताना दिसुन येत आहेत. दरम्यान भारतीय संघाची चिंता वाढवणारी बातमी समोर येत आहे,संघातील प्रमुख खेळाडू आशिया चषक स्पर्धेतून बाहेर होण्याच्या वाटेवर आहे.

येत्या ऑगस्ट महिन्यात आशिया चषक स्पर्धेचे आयोजन केले जाणार आहे. या स्पर्धेचे ठिकाण आणि तारीख जाहीर करण्यात आली आहे. या स्पर्धेपूर्वी श्रेयस अय्यरच्या खेळण्याबाबत मोठी अपडेट समोर आली आहे. तो बॉर्डर -गावसकर ट्रॉफी सुरु होण्यापुर्वी दुखापतग्रस्त झाला होता. काही दिवसांपूर्वी त्याच्या पाठीवर यशस्वी शस्त्रक्रिया केली गेली होती. मात्र तो अजूनही दुखापतीतून पूर्णपणे सावरू शकलेला नाही. त्यामुळे आशिया चषक स्पर्धेतील त्याची उपस्थितीही संशयास्पद असल्याचे म्हटले जात आहे. (Latest sports updates)

टाइम ऑफ इंडियाच्या सूत्राने दिलेल्या माहितीनुसार, 'येत्या ऑगस्ट- सप्टेंबर महिन्यात होणाऱ्या आशिया चषक स्पर्धेत श्रेयस अय्यरचं खेळणं कठीण दिसून येत आहे. एप्रिल महिन्यात श्रेयस अय्यरच्या पाठीच्या दुखण्यावर यशस्वी शस्त्रक्रिया करण्यात आली होती. त्यामुळे त्याला आयपीएल आणि वर्ल्ड टेस्ट चॅम्पियनशिप स्पर्धेच्या अंतिम सामन्यातून माघार घ्यावी लागली होती. आता जुलै- ऑगस्ट दरम्यान होणाऱ्या वेस्ट इंडिज दौऱ्यासाठी देखील त्याची निवड केली गेली नाही.'

यावरून स्पष्ट होत आहे की, श्रेयस अय्यरचं आशिया चषक खेळणं कठीण दिसून येत आहे. तो सध्या नॅशनल क्रिकेट अॅकेडमीमध्ये दुखापतीतून स्वतःला सावरत आहे. त्याच्या पाठीवर यशस्वी शस्त्रक्रिया झाली असली तरीदेखील त्याला अजूनही पाठीचा त्रास होत आहे. ज्यावेळी त्याच्या पाठीवर शस्त्रक्रिया केली गेली होती, त्यावेळी असे म्हटले जात होते की, तो वर्ल्ड कपपर्यंत फिट होऊन मैदानात उतरू शकतो. मात्र आता त्याचं आशिया चषक स्पर्धा खेळणं देखील कठीण झालं आहे.