IPL 2025: अभिषेक शर्माच्या खिशातील 'त्या' चिठ्ठीमागचं रहस्य काय? सामन्यानंतर स्वतः केला खुलासा; म्हणाला, माझ्या मनात आलं की...!

शनिवारी झालेल्या सामन्यात सनरायझर्स हैदराबादने पंजाब किंग्जला धूळ चारली. या सामन्यात हैदराबादचा फलंदाज अभिषेक शर्माने १४१ रन्सची ऐतिहासिक खेळी खेळली. त्याने ट्रॅव्हिस हेडसोबत पहिल्या विकेटसाठी १७१ रन्सची पार्टनरशीप केली. ज्यामुळे २४६ रन्सचं आव्हान गाठणं सोपं झालं. या सामन्यात अभिषेकने शतक पूर्ण केलं तेव्हा त्याने एका खास पद्धतीने सेलिब्रेशन केलं. त्याने कागदाची एक चिठ्ठी काढली आणि सर्वांना दाखवली.

अभिषेक शर्माने ४० चेंडूत आपलं शतक पूर्ण केलं. सनरायझर्स हैदराबादसाठी हे दुसरं सर्वात जलद शतक होतं. याआधी ट्रॅव्हिस हेडने ३९ बॉल्समध्ये शतक झळकावलं होतं. अभिषेक शर्माने शतक झळकावलं आणि खिशातून एका चिठ्ठी काढली. या चिठ्ठीवर लिहिलं होतं की, हे ऑरेंज आर्मीसाठी आहे (This One is For Orange Army) . याचा अर्थ अभिषेक शर्माने त्याचं हे ऐतिहासिक शतक त्याच्या चाहत्यांना समर्पित केलं.

सामन्यानंतर काय म्हणाला अभिषेक?

सामन्यानंतर अभिषेकने त्याच्या या स्पेशल सेलिब्रेशन संदर्भात सांगितलं. तो म्हणाला की, "मी हे स्वतः लिहिलंय कारण मी सहसा सकाळी उठतो आणि काहीतरी लिहितो. आज माझ्या मनात आलं की, जर मी आज चांगला खेळलो तर मी ऑरेंज आर्मीला समर्पित करेन. आज मला वाटलं की हा माझा दिवस आहे."

श्रेयस अय्यरनेही पाहिली चिठ्ठी

अभिषेकच्या सेलिब्रेशननंतर, पंजाब किंग्जचा कर्णधार श्रेयस अय्यर त्याच्याकडे आला आणि चिठ्टीवर काय लिहिलंय हे पाहिलं. अभिषेक शर्माने ५५ चेंडूत १४१ रन्सची ऐतिहासिक खेळी केली. या डावात त्याने १० सिक्स आणि १४ चौकार मारले. आयपीएलमध्ये भारतीय फलंदाजाने खेळलेली ही सर्वात मोठी वैयक्तिक खेळी होती.

इतर खेळाडूंचे मानले आभार

सामना संपल्यानंतर अभिषेक शर्माने कर्णधार आणि टीममधील इतर खेळाडूंचे आभार मानले. अभिषेक म्हणाला, गेल्या ४ सामन्यांमध्ये फलंदाज चांगली कामगिरी करत नव्हते पण तरीही टीममधील वातावरण चांगलं होतं. माझे आईवडील आज स्टेडियममध्ये आले होते. मी त्यांची वाट पाहत होतो.