Champions Trophy Final: ठरलं! भारत- न्यूझीलंड फायनलमध्ये भिडणार; केव्हा, कुठे अन् कधी होणार सामना?

आयसीसी चॅम्पियन्स ट्रॉफी २०२५ स्पर्धेतील फायनलमध्ये जाणारे २ संघ ठरले आहेत. या स्पर्धेतील फायनलचा सामना भारत आणि न्यूझीलंड या दोन्ही बलाढ्य संघांमध्ये होणार आहे. भारतीय संघाने ऑस्ट्रेलियाला पराभूत करत या स्पर्धेची फायनल गाठली, तर दुसऱ्या सेमीफायनलमध्ये न्यूझीलंडने दक्षिण आफ्रिकेचा धुव्वा उडवत या स्पर्धेची अंतिम फेरी गाठली आहे. हा सामना न्यूझीलंडने ५० धावांनी आपल्या नावावर केला.

लाहोरच्या गद्दाफी स्टेडियममध्ये जेव्हा सामना झालाय, तेव्हा गोलंदाजांची चांगलीच धुलाई झालीये. या सामन्यातही असंच काहीसं चित्र पाहायला मिळालं. न्यूझीलंडच्या फलंदाजांनी दक्षिण आफ्रिकेच्या गोलंदाजांचा चांगलाच समाचार घेतला. मात्र दक्षिण आफ्रिकेच्या फलंदाजांना या खेळपट्टीवर टीचून फलंदाजी करता आली नाही.

न्यूझीलंडने दक्षिण आफ्रिकेसमोर विजयासाठी ३६३ धावांचे आव्हान ठेवले होते. इतक्या धावा कुठल्याच संघाला करता आल्या नव्हत्या. त्यामुळे दक्षिण आफ्रिकेला फायनलमध्ये जाण्यासाठी वर्ल्ड रेकॉर्ड मोडून काढायचा होता.

हे काही दक्षिण आफ्रिकेच्या फलंदाजांना जमलं नाही. सुरुवातीलाच रायन रिकलटन १७ धावा करुन बाद झाला. त्यानंतर बावुमा आणि रासी वान डर डुसेनने मिळून महत्वपूर्ण भागीदारी केली. बावुमाने ५६ धावांची खेळी केली.

तर डुसेने ६९ धावा करत माघारी परतला. त्यानंतर एडेन मार्करमवर मोठी जबाबदारी होती. त्याला अवघ्या ३१ धावा करता आल्या. हेनरिक क्लासेनकडून मोठ्या खेळीची अपेक्षा होती. मात्र तो अवघ्या ३ धावांवर नको तो शॉट खेळून माघारी परतला. मात्र दक्षिण आफ्रिकेला दिलेलं आव्हान गाठता आलं नाही.

न्यूझीलंडने केल्या सर्वोच्च धावा

या सामन्यात न्यूझीलंडने नाणेफेक जिंकून प्रथम फलंदाजी करण्याचा निर्णय घेतला होता. मात्र न्यूझीलंडला सुरुवातीलाच मोठा धक्का बसला. सलामीवीर फलंदाज विल यंग स्वस्तात माघारी परतला. त्याला अवघ्या २२ धावा करता आल्या. त्यानंतर केन विलियम्सन आणि रचिन रविंद्रने मिळून न्यूझीलंडचा डाव सांभाळला.

दोघांनी मिळून १५० हून अधिक धावांचा डोंगर उभारला. या दोघांनीही शतकं झळकावली. रचिन रविंद्रने १०१ चेंडूंचा सामना करत १०८ धावांची खेळी केली. तर केन विलियम्सनने ९४ चेंडूंचा सामना करत १०२ धावांची खेळी केली. या दोघांनी मिळून न्यूझीलंडच्या डावाचा पाया रचला. शेवटी डॅरील मिचेल ४९ आणि ग्लेन फिलिप्सननेही नाबाद ४९ धावांची खेळी केली. यासह न्यूझीलंडने ३६२ धावांचा डोंगर उभारला. ही या स्पर्धेच्या इतिहासातील सर्वोच्च धावसंख्या आहे.

भारत - न्यूझीलंड फायनलमध्ये भिडणार

या स्पर्धेतील फायनलचा सामना भारत आणि न्यूझीलंड या दोन्ही संघांमध्ये रंगणार आहे. हा सामना रविवारी ९ मार्चला दुबईतील दुबई आंतरराष्ट्रीय क्रिकेट स्टेडियममध्ये रंगणार आहे. या समन्याला भारतीय वेळेनुसार दुपारी २:३० वाजता सुरुवात होईल.