रोहित शर्मा २०२७ चा वर्ल्ड कप खेळणार की नाही? हिटमॅनने स्पष्टच सांगून टाकलं,गिलच्या कॅप्टनशीपवरही भाष्य

भारताचा अनुभवी फलंदाज रोहित शर्मा २०२७ च्या विश्वचषकात खेळणार की नाही? याबाबत प्रत्येक सामन्यावेळी चर्चा होते. विंडिजविरोधात दुसऱ्या वनडे सामन्याआधी विराटने २०२७ विश्वचषक आपला शेवटचा असल्याचे सांगितले. त्यानंतर सर्व नजरा रोहित शर्मावर खिळल्या होत्या. रोहित शर्मा विश्वचषक खेळणार की नाही? असा सवाल विचारला जात होता. यावर रोहित शर्माने स्पष्टच शब्दात उत्तर दिले आहे.

भारत आणि वेस्ट इंडिज यांच्यातील दुसऱ्या वनडे सामन्यापूर्वी जिओस्टारशी (JioStar) बोलताना रोहित शर्माने शुभमन गिलची कर्णधारपद, २०२७ चा वर्ल्ड कप जिंकण्याची इच्छा आणि आगामी काळातील नियोजन यावर उघडपणे भाष्य केले. तो 'बिंदास रोहित' या जिओहॉटस्टार (JioHotstar) च्या विशेष मुलाखतीत बोलत होता. भारत विरुद्ध वेस्ट इंडिज यांच्यातील तिसरा वनडे सामन्यावेळी हा शो प्रसारित केला जाईल.

शुभमन गिलच्या कर्णधारपदाबद्दल रोहित म्हणाला:

शुभमन गिलकडे क्रिकेटची खूप चांगली समज आहे, यात काही शंका नाही. तो गेल्या वर्षभरापासून कर्णधारपद भूषवत आहे, त्यामुळे एवढ्या लवकर त्याच्या नेतृत्वाची परीक्षा घेणे चुकीचे ठरेल. पण आतापर्यंत त्याने जे काम केले आहे ते नक्कीच प्रभावी आहे. त्याला मैदानावर काय करायचे आहे, याबद्दल त्याच्या मनात स्पष्टता आहे. कर्णधारासाठी हीच सर्वात महत्त्वाची गोष्ट असते. जर कर्णधार स्पष्ट असेल, तर संघातील खेळाडूंनाही त्यांची भूमिका व्यवस्थित समजते. शुभमन योग्य दिशेने वाटचाल करत आहे. अर्थात, कोणत्याही कर्णधाराला संघातील खेळाडू आणि सपोर्ट स्टाफच्या मदतीची गरज असते. मी त्याला शक्य ती सर्व मदत करत राहीन असे रोहित शर्मा म्हणाला.

शुभमनला पाठिंबा देण्याबाबत:

शुभमन आता कर्णधार आहे, याचा अर्थ असा नाही की मी त्याच्याशी कमी बोलेन किंवा लांब राहीन. त्याने पदार्पण केल्यापासून आम्ही एकाच दिशेने काम करत आहोत आणि त्यात कोणताही बदल होणार नाही. संपूर्ण संघ त्याच्या पाठीशी उभा आहे, हा विश्वास त्याला मिळणे गरजेचे आहे. त्याला साथ देणे आणि संघाला पुढे घेऊन जाणे हे आमचे काम आहे, असे रोहित म्हणाला.

२०२७ चा वर्ल्ड कप जिंकण्याबाबत:

आगामी वनडे वर्ल्ड कप जिंकणे माझ्यासाठी खूप खास असेल. मी भूतकाळाचा किंवा भविष्याचा जास्त विचार करत नाही. भारतासाठी वर्ल्ड कप जिंकणे ही एक वेगळीच भावना असते. मी टी-२० फॉरमॅटमध्ये दोनदा हा आनंद अनुभवला आहे. २००७ मध्ये मी अवघा २० वर्षांचा होतो आणि पहिल्याच वर्षी वर्ल्ड कप जिंकणे भारी होते. त्यानंतर २०१३ मध्ये आम्ही चॅम्पियन्स ट्रॉफी जिंकली, पण त्यानंतर तब्बल ११ वर्षे भारताला एकही आयसीसी ट्रॉफी जिंकता आली नाही. म्हणूनच, जेव्हा आम्ही २०२४ मध्ये टी-२० वर्ल्ड कप जिंकला, तेव्हा त्या विजयाचे महत्त्व किती मोठे आहे याची जाणीव झाली. तो आनंद आणि तो अनुभव शब्दात मांडता येणार नाही. तीच भावना मला पुन्हा एकदा अनुभवायची आहे, म्हणूनच २०२७ चा वर्ल्ड कप माझ्यासाठी अत्यंत महत्त्वाचा असल्याचे रोहितने सांगितले.

२०२७ च्या वर्ल्ड कपची तयारी आणि वर्तमानात जगणे:

मला २०२७ पर्यंत स्वतःला पूर्णपणे तंदुरुस्त (Fit) ठेवायचे आहे. मेहनत करत राहणे आणि प्रत्येक सामन्यात चांगली कामगिरी करणे हेच माझे ध्येय आहे. आत्तापासूनच पुढच्या वर्षाचा विचार करत बसलो तर मी माझा खेळ नीट खेळू शकणार नाही. त्यामुळे सध्या समोर असलेल्या सामन्यांवर लक्ष केंद्रित करणे आणि टप्प्याटप्प्याने पुढे जाणे माझ्यासाठी महत्त्वाचे आहे. मी माझ्या फिटनेसवर आणि फलंदाजीवर मेहनत घेत राहीन, तसेच संघात जेव्हा जेव्हा माझी गरज असेल तेव्हा तरुणांना मार्गदर्शन करत राहीन, असे रोहित शर्मा म्हणाला.